Temirtaýdaǵy Tuńǵysh Prezıdenttiń tarıhı-mádenı ortalyǵynda «Elin súıgen, eli súıgen Elbasy!» atty saltanatty rásim ótti. Mereke qarsańynda uıymdastyrylǵan bul shara barysynda Qaraǵandy oblysynyń ákimi Erlan Qoshanov Elbasynyń seriktesterimen kezdesti.
– Biz Tuńǵysh Prezıdenttiń ómiri Qaraǵandy oblysymen baılanysty ekenin maqtan tutamyz. Temirtaý – onyń jastyq shaǵynyń qalasy. Munda Nursultan Ábishuly Nazarbaev jetekshi, kóshbasshy retinde qalyptasty, – dedi óńir basshysy.
Kezdesý kezinde Elbasynyń seriktesteri ózderiniń estelikterimen bólisti. Mysaly, ardager-metallýrg Ermek Tileýbaev bylaı dedi:
– Men Nursultan Nazarbaevpen birge oqydym. Sol kezdiń ózinde ol kóshbasshylyq qyrlaryn kórsetetin.
Al Elbasynyń taǵy bir úzeńgiles serigi, ardager metallýrg Qýanysh Omashev bylaı dep syr tarqatty:
– Temirtaý qalasyna kelgende nebári 17 jastaǵy jetkinshek edim. Nursultan Nazarbaevpen osy qalada tanystym. Bir kýrsta oqydyq, birge jumys istedik. Kúndiz jumysta bolsaq, túnde oqýǵa baratynbyz. Aýyr jumysqa shydamaı, elge qaıtyp ketip jatqandar da boldy. Nesin jasyraıyn, meniń de ketkim kelgen edi. Alaıda, bul oıymdy Nursultan qoldamady. Qaıta «Sen ketseń, men ketsem, kim qalady? Qazaq ónerkásibin kim kóteredi?», dep jigerlendirip, osynda qalýǵa kóndirdi. Búginde ardager metallýrg bolyp otyrǵandardy osy jerde qalyp, eńbek etýge úgittegen de Elbasymyz bolatyn.
Shara barysynda tarıhı-mádenı ortalyq, oblystyq muraǵat jáne N.V.Gogol atyndaǵy oblystyq ámbebap kitaphanasy birlesip shyǵarǵan «Saryarqa tósindegi kezdesýler» kitabynyń tusaýkeser rásimi ótti. Kitapta Elbasynyń 1990 jyldan 2018 jylǵa deıingi aralyqta Qaraǵandy oblysyna jasaǵan saparlary týraly gazet maqalalary men muraǵat materıaldary toptastyrylǵan.
– Jınaqtyń negizgi maqsaty – jastarǵa Elbasynyń ómiri men qyzmeti týraly taǵylymdy aqparat usyný. Memleket basshysynyń 90-shy jyldan bastap, búginge deıingi Qaraǵandy oblysyna kelgen ár saparyn qamtyp, kitapqa engizdik, – deıdi ortalyqtyń ǵylymı zertteý bóliminiń basshysy Dáribek Ketebaev.
Sonymen qatar Prezıdenttiń súıikti ánderi jáne Nursultan Nazarbaevtyń jazǵan týyndylary oryndalǵan merekelik konsert uıymdastyryldy. Taıaýda atalǵan ortalyq Astanadan jetkizilgen jádigerlermen tolyqqan bolatyn. Olardyń qatarynda Prezıdenttiń jeke zattary, basqa memleketterdiń basshylary jáne tanymal saıası qaıratkerler tartý etken syılyqtar bar. Jańadan qosylǵan jádigerlerdiń ishinde Qazaqstan Konstıtýsııasynyń úlken kórkem basylymyn atap ótýge bolady. Sonymen qatar Olımpıada chempıony Aleksandr Vınokýrovtyń Prezıdentke syılaǵan velosıpedi de ortalyq tórinen oryn alǵan. Budan bólek, bul jerde Elbasynyń jeke sporttyq jabdyqtaryn: tennıske arnalǵan formasy men raketkasyn da kórýge bolady.
Aıta ketý kerek, bıyl Tuńǵysh Prezıdenttiń tarıhı-mádenı ortalyǵy kúrdeli jóndeýden ótken bolatyn. Buǵan bıýdjetten 215 mln teńge bólinip, ǵımarattyń ishi men syrtyna jóndeý jumystary júrgizildi.
Qaırat ÁBILDA,
«Egemen Qazaqstan»
Qaraǵandy oblysy, Temirtaý qalasy