Tuńǵysh Prezıdent kúni merekesinde Altaı (Zyrıan) aýdanynda Tatýlasý ortalyǵy ashyldy. Ortalyqtyń ashylýyna oblystyq sottyń azamattyq ister jónindegi sot alqasynyń tóraǵasy Damır Ábdýǵalıev, aýdan ákimi Nurjan Toqseıitov, aqsaqaldar men medıatorlar qatysty.
Altaı qalasynda esigin aıqara ashqan ortalyqty Shyǵys Qazaqstanda jumysyn bastaǵan alǵashqy ortalyqtaryń biri, qarlyǵashy deýge bolady. Oblystyq sottyń azamattyq ister jónindegi sot alqasynyń tóraǵasy Damır Ábdýǵalıevtiń aıtýynsha, ortalyq Joǵary sottyń «Sot júıesiniń 7 tasy» jobasy aıasynda ashylyp otyr. «Ortalyqty ashý jónindegi usynysymyzdy aýdan ákimi Nurjan Toqseıitov qýana quptap, bizge ǵımarat berdi. Biz ol ǵımaratty oblystyq sottyń kómegimen jóndeýden ótkizdik», - deıdi aýdandyq sottyń tóraǵasy Aıken Ismagýlov.
Endi aýdan men qala turǵyndarynyń túıtkildi máselelerin sheshýge medıatorlar, notarıýstar, psıhologtar men sot oryndaýshylary kómektesedi. Aýdandyq sot tóraǵasynyń sózine sensek, jańa ortalyqta zańdyq jáne psıhologııalyq bilimi bar mamandardan, kásibı jáne kásibı emes medıatorlardan keńester alýǵa bolady. Aýdan jáne qala turǵyndaryna barlyq qyzmetter tegin kórsetiledi.
Saltanatty sharada sóz alǵan aýdan ákimi Nurjan Toqseıitov ortalyq Elbasy tapsyrmalaryn oryndaý aıasynda ashylǵanyn, yryń-jyryń bolǵannan ymyraǵa kelgenniń myń artyqtyǵy ata-babalarymyzdan qalǵan sara jol ekendigin atap ótti. «Mundaı ortalyqtardy oblystyń barlyq qalalary men aýdandarynda ashý qajet. Olardyń quramynda zańdyq bilimi bar mamandar ǵana emes, psıhologtardyń bolýy da mańyzdy. Búginde úılene sala ajyrasyp jatqan jastar óte kóp. Olar qaıta qosylýy úshin der kezinde bilikti mamandardyń kómegi qajet. Máselen, Ulybrıtanııada eki jas ajyrasqan jaǵdaıda medıatorlarǵa barýy zańmen bekitilgen», - deıdi advokat Lılııa Safına.
Ortalyqtyń ashylý saltanaty aıasynda aýdandyq sot, aýdan ákimdigi jáne aqsaqaldar keńesi arasynda yntymaqtastyq jónindegi memorandýmǵa qol qoıyldy.
Azamat QASYM,
«Egemen Qazaqstan»
Shyǵys Qazaqstan oblysy,
Altaı aýdany