Jezqazǵan qalasyndaǵy apattyq jaǵdaıda turǵan kópqabatty úıdiń máselesi oń sheshimin tapty. Mundaı nátıje qala basshylyǵynyń osy maqsatqa bólingen bıýdjet qarajatyn uqypty paıdalanýynyń arqasynda múmkin boldy.
Eń aldymen qala ákimi tehnogendik sıpattaǵy nysanalyq aýqym boıynsha tótenshe jaǵdaı jarııalaý týraly sheshim qabyldady. Odan keıin zańnamaǵa sáıkes, jyljymaıtyn múlikti memleket menshigine alý rásimi júrgizildi. Osynyń nátıjesinde, apatty úıdiń 48 páterindegi turǵyndar ótemaqy alý múmkindigine ıe boldy. Al jekeshelendirilmegen eki páterdiń ıelerine basqa baspana berildi.
Apatty úıdiń turǵyndary máseleniń osylaısha oń sheshim tapqanyna toq kóńil bildiristi. Mysaly, turǵyndardyń biri Dmıtrıı Naımýshın bylaı deıdi:
– Másele sheshildi. Biz jetkilikti ótemaqy alyp, jańa baspana alǵanymyzǵa qýanyshtymyz.
– Barlyǵynyń sátti sheshilgeni jaqsy boldy. Biz qazir basqa páter izdep jatyrmyz, máselemiz oń sheshilgeni úshin alǵysymyzdy aıtamyz, – dep rızashylyǵyn bildirdi Tańat Baıtórın degen turǵyn.
Qaırat ÁBILDA,
«Egemen Qazaqstan»
Qaraǵandy oblysy