14 jeltoqsan kúni saǵat 11:00-de Astanadaǵy Ulttyq akademııalyq kitaphanada balalarǵa arnalǵan «Ilııas pen Zańǵardyń plansheti» jáne «Ybyraı atamnyń áńgimeleri» atty jańa kitaptardyń tusaýkeseri ótedi.
«Qazaq ishinde bala isine erekshe kóńil bólip, aǵartýshylyq baǵytta ónimdi jumys qylǵandardyń biri – Ybyraı Altynsary. Qansha ýaqyt ótse de jazýshynyń shyǵarmalary ózekti, mańyzyn joǵaltpaǵan. Birinshi kitapta ult ustazynyń 8 áńgimesi berilgen. Ekinshi kitapta qalada turatyn, tehnologııany tańsyq kórmeıtin, biraq ulttyq tárbıe kórgen balalardyń beınesi sýrettelgen. Eki oqýlyq ta komıks janry negizinde jaryqqa shyǵyp otyr.
Joba «Aıala» balalardy damytý ortalyǵy, «Nur Astana qurylys» JShS-nyń demeýshiligimen iske asty. Al jobanyń avtory - QR Parlamenti Májilisiniń depýtaty, qoǵam qaıratkeri Bekbolat Tileýhan myrza», - deıdi joba jetekshisi Azamat Baıǵalıuly.
Jıynda jańa kitaptardyń erekshelikteri týraly aıtylyp, jalpy bala isindegi baspa máselesi, ulttyq tárbıe quraldary sóz bolady.
Jańa kitaptardyń tusaýkeseri 16 jeltoqsan – Táýelsizdik kúni merekesine oraılastyrylǵan. Saltanatty shara depýtattar men zııaly qaýym ókilderi, ustazdar, aqyn-jazýshylar, ata-analar men balalardyń qatysýymen ótedi. Kezdesý aıasynda Astana qalasynyń Qýyrshaq teatry ártisteri «Qańbaq shal» qoıylymyn usynady.