Qazaq memlekettik qyzdar pedagogıkalyq ýnıversıtetiniń jas ǵalymdary robototehnıka boıynsha startap jobalar jasaýdy qolǵa almaq.
Ýnıversıtette osy tarapta ǵylymı-zertteý jumystaryn júrgizýge baǵyttalǵan arnaıy seksııalyq úıirmeler qurý da kózdelip otyr. Onda ýnıversıtet ǵalymdary robototehnıka boıynsha óńirlerdegi joǵary oqý oryndarynyń stýdentteri men mektep oqýshylaryn zamanaýı zerthanalyq jumystarǵa tartyp, olardyń ǵylymı áleýetin kótermek.
Buǵan Qyzdar ýnıversıtetiniń materıaldyq-tehnıkalyq bazasy tolyq múmkindik beredi. Fızıka-matematıka fakýltetiniń janyndaǵy «Robototehnıka» zerthanasy Lego, Arduino jáne Raspberry robottarymen, oqý-ádistemelik jáne baǵdarlamalyq nusqaýlyqtarmen jabdyqtalǵan.
Atalǵan zerthana naqty eki maqsat boıynsha jumys isteıdi. Birinshiden, qazirgi kúnde orta bilim salasy úshin zamanaýı biliktiligi joǵary, básekelestik qabileti myqty maman daıarlaý mindeti tur. Búginde elimizdiń barlyq orta bilim berý mekemeleri Nazarbaev Zııatkerlik mektepterinde bastaý alǵan STEAM bilim berý tehnologııasyn júzege asyrýdy kózdep otyr. Osy talaptarǵa saı maman oqytyp shyǵarý maqsatyndaǵy alǵashqy qadam robototehnıka zerthanasynyń ashylýy. Ekinshiden, qazir aqparattyq tehnologııalardyń qaryshtap damyǵan ýaqyty. Bul baǵytta búginde álemde qarqyndy jumystar júrgizilip jatyr. Bir ǵana Azııada bes mıllıonǵa jýyq mektep oqýshysy robototehnıkamen aınalysyp jatqandyǵy kóp nárseden habar berip turǵany aıtpasa da túsinikti.
Marwin brendimen jabdyqtalǵan jıyntyqtar arqyly stýdentter teorııa men tájirıbeni ushtastyra alady. Sonymen qatar zamanaýı quraldy tereń meńgere túsedi. Bir bul ǵana emes. Kompıýterlik baǵdarlamalar arqyly jumys isteıtin bólshekterden túrli robottar jasaýǵa bolady. Bul – shyǵarmashylyqtyń tyń túrimen aınalysýǵa múmkindik beredi.
– Robot tehnıkalarymen jumys isteý balanyń oılaý qabiletin damytyp, ózge pánderdi de jaqsy meńgerýine septigin tıgizedi. Ýnıversıtet stýdentteri Lego qurastyrmaly bólshekterinen arnaıy baǵdarlama arqyly ózdiginen júretin túrli robotty kólikter, túrli kedergiler kezdesse de óz baǵytynan taımaıtyn tankilerdi qurastyrýdy úırenýde. Olar bastapqyda shaǵyn mashınalar qurastyryp, keıinnen kúrdeli baǵdarlamalarǵa kóshedi. Maqsat –bolashaq pedagog mamandarǵa robot tehnıkalaryn qurastyrýdy jete tanystyrý, zamanaýı tehnologııalarmen jumys isteýge mashyqtandyrý.
Aınash ESALI,
«Egemen Qazaqstan»
ALMATY