Fransııanyń Levallýa-Perre qalasynda ótken kásipqoı boks keshinde birinshi orta salmaqta kúsh synasqan qazaqstandyq Aleksandr Jýravskıı marokkolyq Muhammed Rabııden jeńildi.
Segiz raýndtyq báseke barysynda osy kúnge deıin eshkimnen jeńilip kórmegen Rabııdiń basymdyǵy baıqaldy. Jerlesimizge qaraǵanda ol áldeqaıda shıraq qımyldap, kóbirek soqqy jumsady. Muhameddtiń tehnıkalyq jáne taktıkalyq turǵydan da myqty ekeni kórindi. Jekpe-jek aıaqtalǵan bette tóreshilerdiń barlyǵy da jeńisti biraýyzdan Marokko boksshysyna berdi.
Esterińizge sala keteık, 2015 jyly Dohada ótken álem chempıonatynyń fınalynda dál osy boksshy bizdiń Danııar Eleýsinovten basym túsip, bas júldeni oljalaǵan bolatyn. 2016 jyly Rıo de Janeıroda alaýy tutanǵan Olımpııa oıyndarynyń jartylaı fınalynda Muhammed Rabıı ózbekstandyq Shahram Gııasovqa utyldy. Al ózbektiń óreni fınalda bizdiń Danııar Eleýsinovke ese jiberdi.
Osy sátsizdikten keıin Aleksandr Jýravskıı birinshi orta salmaqtaǵy BoxRec reıtınginde birden 49 satyǵa tómendep, qazirgi kezde 223 oryndy qanaǵat tutýda. Al Muhammed Rabıı bolsa, 12 satyǵa joǵarlap, 62 orynǵa jaıǵasty.
Ǵalym SÚLEIMEN,
«Egemen Qazaqstan»