Táýelsizdik kúni merekesine oraı Jambyl oblysynda 28 nysan ashyldy. Onyń 12-si kópqabatty turǵyn úı bolsa, 7 dárigerlik ambýlatorııa, 4 balabaqsha, 4 aýyz sýmen qamtamasyz etý jáne 1 káriz júıesi paıdalanýǵa berildi. Atalǵan jumystyń bári Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halyqqa Joldaýyndaǵy basym mindetterdi oryndaýǵa jáne halyqtyń turmys sapasyn arttyrýǵa negizdelgen.
Joldaýdyń ómir súrýge jaıly orta qalyptastyrý basymdyǵy boıynsha Elbasynyń «Bes áleýmettik bastamasynyń» birinshi baǵyty «Árbir otbasyna baspana alýdyń jańa múmkindikterin berý» aıasynda birqatar jobalar iske asyrylýda. Oǵan mereke aıasynda paıdalanýǵa berilgen 12 kóppáterli turǵyn úı dálel bola alady. Onyń toǵyzy Taraz qalasynyń Súleımenov kóshesiniń sońyndaǵy jańa №15, al ekeýi «Báıterek» móltek aýdandarynan berildi. Sondaı-aq, Shý qalasyndaǵy «Jetisý» turǵyn alqabyndaǵy 75 páterli kópqabatty turǵyn úı qaıta jóndeýden ótti.
Búginde Taraz qalasyndaǵy qajetti ınfraqurylymmen qamtamasyz etilgen 462 gektar jer teliminde jańa eki móltek aýdandarynyń qurylysy júrýde. Atalǵan aýdandarda «7-20-25» baǵdarlamasy aıasynda usynylatyn 480 kóp qabatty jáne 969 jeke turǵyn úı qurylystary bastalyp, aǵymdaǵy jyly 10 kóppáterli úı (800 páter), 2019 jyly - 25 úı (1 380 páter) paıdalanýǵa tapsyrylý josparlanǵan. Jalpy, qazirgi kezde Taraz qalasyndaǵy 686 páter baǵdarlama aıasynda azamattarǵa usynylýda.
Aıta ketý kerek, №15 jańa móltek aýdanyndaǵy kóppáterli turǵyn úılerdiń birinshi qabattaryn iskerlik ortaǵa berý kózdelýde. Osyǵan oraı óńirde tıisti sharalar atqarylýda. Osylaısha turǵyn úı ǵımarattarynyń syrtqy ajaryn arttyrý josparlanýda. Jańa móltek aýdannyń jospary qaıta qaralyp, onda aldaǵy ýaqytta oqýshylar, neke qııý, saltanat saraılary, ákimshilik ǵımarattar men áleýmettik nysandar boı kóteretin bolady. Halyqqa qyzmet kórsetý ortalyǵy, qonaqúı, Táýelsizdik monýmenti, úlken saýda-oıyn saýyq ortalyǵynyń qurylystaryn júrgizý josparda bar. «7-20-25» kredıtteý baǵdarlamasy aıasynda ákimdik pen QR Ulttyq bankiniń oblystyq fılıaly, baǵdarlamaǵa qatysýshy bankter arasynda birlesken is-qımyl jospary bekitilgen. Ipotekalyq nesıeniń alǵashqy jarnasynyń 30 paıyzdan 20 paıyzǵa tómendeýine baılanysty, páter alýǵa múmkindigi bar azamattardyń sany 3 esege artqan.
Sonymen qatar Elbasy Joldaýynda medısınalyq qyzmet sapasy halyqtyń áleýmettik kóńil-kúıiniń asa mańyzdy komponenti bolyp sanalatynyń basa aıtty desek, mereke qarsańynda ashylǵan 28 nysannyń 7-si medısınalyq mekemeler bolyp otyr. «Ásirese aýyldyq jerlerde alǵashqy medısınalyq-sanıtarlyq kómektiń qoljetimdi bolýyn qamtamasyz etý qajet. Alǵashqy medısınalyq-sanıtarlyq kómek kórsetetin qyzmetkerlerdi yntalandyrý úshin 2019 jyldyń 1 qańtarynan bastap aýrýlardy emdeý isin basqarýdyń jańa tásilderin engizgen ýchaskelik medısına qyzmetkerleriniń jalaqysyn kezeń-kezeńmen 20 paıyzǵa kóbeıtýdi tapsyramyn», degen bolatyn Memleket basshysy. Osy oraıda oblys kóleminde halyq densaýlyǵynyń sapasyn arttyrý maqsatynda aýqymdy jumystar júrgizilýde. Jekemenshik sektordy jumyldyra otyryp, qarjylandyrý men basqarýdyń jańa ádisteri qoldanylýda. Medısınalyq qyzmet sapasyn arttyrý boıynsha ınnovasııalyq ádis-tásilderi engizilip, jańa ǵımarattar men nysandardyń qurylysy júrgizildi. Táýelsizdik kúni ashylǵan 7 medısınalyq nysannyń 2-i memlekettik, 5-i memlekettik-jekemenshik áriptestik aıasynda boı kótergen. Olar Baızaq aýdanyndaǵy Kókózek, Jýaly aýdanyndaǵy Ertaı, Qoshqarata, Qordaı aýdanyndaǵy Jańaturmys, T.Rysqulov aýdanyndaǵy Mamaı jáne Qaıyńdy, Shý aýdanyndaǵy Kókqaınar, Báıdibek aýyldarynda ornalasqan. Bul ashylǵan medısınalyq mekemeler arqyly aýyldyq jerlerdegi alǵashqy medısınalyq kómek kórsetý qajettiligi 84 paıyzǵa qamtylady. Jalpy buǵan deıin oblysta 95 alǵashqy medısınalyq kómek kórsetý uıymdaryna ǵımarat qajet bolatyn.
Bul bıýdjettik ınvestısııalyq joba retinde júzege asyrylǵanda, oǵan jalpy 6 567,6 mıllıon teńge jáne 7 jyl ýaqyt kerek bolatyn. Al, memlekettik-jekemenshik áriptestik aıasynda salý arqyly merzimin 3 jylǵa, jumsalatyn qarjy kólemi 2 376 mıllıon teńgege qysqartyldy. Naqtyraq aıtqanda, 4 jyl ýaqyt jáne 4 192 mıllıon teńge qarjy únemdelip otyr. Iаǵnı, 95 nysannyń 29-y bıyl ashyldy. Osy sekildi 2019 jyly 40, 2020 jyly 25 nysan boı kóteredi dep josparlanýda.
Elimizdiń Táýelsizdik kúnine oraı Jambyl oblysynda halyqtyń turǵyn úı men medısınalyq mekemelerge degen qoljetimdiligin arttyrýǵa arnalǵan bul nysandardan bólek, jurtshylyqtyń áleýmettik turmys sapasyn jaqsartýǵa negizdelgen mekemeler de el ıgiligine berildi. Atap aıtar bolsaq, Jambyl aýdanyndaǵy Toǵyztaraý aýylynyń sýmen qamtamasyz etý júıesi iske qosylsa, Prıgorodnoe jáne Qordaı aýdanyndaǵy Aýqatty aýylynyń sýmen qamtasyz etý júıesi qaıta jańǵyrtyldy.
Talas aýdanyndaǵy Qyzyláýit aýylynyń ınjenerlik kommýnıkasııalyq ınfraqurylymyn damytý jáne jaılastyrý, Shý aýdanyndaǵy Tóle bı aýylynyń káriz júıesin qaıta jańǵyrtý sharalary aıaqtaldy. Qordaı aýdanyndaǵy 100 oryndyq «Aıarý», «Aısultan», «Senim Qordaı», «Nursıla» jekemenshik balabaqshalar esigin aıqara ashty. Bul oblystaǵy mektepke deıingi tárbıemen qamtylǵan 3-6 jastaǵy balalardyń úlesin 98 paıyzǵa jýyqtatty. Al, keler jyly taǵy 29 balabaqsha ashý arqyly 3-6 jastaǵy balalardy mektepke deıingi tárbıemen 100 paıyz qamtý kózdelip otyr.
Sonymen qatar oblysta bıyl veterınarııalyq pýnktterdi tıptik úlgidegi ǵımaratpen qamtý boıynsha da aýqymdy jumystar atqaryldy. Aıtalyq, ótken jyly óńirde nebary 22 vetpýnkt bolatyn bolsa, aǵymdaǵy jyly olardyń qatary 45-ke artyp, jalpy sany 71-ge jetti. Bul da júıeli jumystyń nátıjesi ekendigi sózsiz.
Hamıt Esaman,
«Egemen Qazaqstan»
Jambyl oblysy