Japonııa Imperatory Akıhıtonyń týǵan kúnine oraı atalǵan eldiń Qazaqstandaǵy elshiligi qabyldaý rásimin ótkizdi. Saltanatty sharaǵa sheneýnikter men ózge elshilik ókilderi jınaldy.
Japonııanyń joǵary mártebeli Imperatory 23 jeltoqsan kúni 85 jasqa tolady. Aıta ketý kerek, aldaǵy jyly ımperatordyń bılik basynda júrgenine 30 jyl tolmaq. Sáıkesinshe, kelesi jyldyń sáýirinde óz ornyn bosatyp, mamyrda murager hanzada taqqa otyrady. Bul ózgerister Qazaqstan men Japonııa memleketteri arasyndaǵy qarym-qatynasqa keri áser etpeıdi. Bıylǵy jyldyń ózinde ártúrli salany qamtyǵan eki el arasyndaǵy baılanys nyǵaıa tústi. Qazaq jerinde Japonııa elshiliginiń muryndyq bolýymen Astana qalasynyń 20 jyldyǵyna arnalǵan halyqaralyq konferensııalar men sımpozıýmdardan bólek birneshe is-shara ótkizilgen.
Jalpy baılanys aıasynda ekonomıka, saýda jáne ınvestısııa máseleleri talqylanyp, ortaq kelisimder jasalǵan. Buǵan deıin Almaty men Astanada jańadan japon zaýyttary ashylyp, birlesken kásiporyndar quryldy.
– Japonııa men Qazaqstan BUU men basqa da saıası alań sheńberinde belsendi túrde birlese qyzmet atqaryp keledi. Sonymen qatar halyqaralyq arenada seriktes elder. Biz Qazaqstannyń BUU Qaýipsizdik Keńesiniń turaqty emes múshesi retinde qyzmetin joǵary baǵalaımyz, – dedi Japonııanyń Qazaqstandaǵy elshisi Itıro Kavabata.
Qazaqstan tarapynan sóz alǵan elimizdiń syrtqy ister vıse-mınıstri Erjan Ashyqbaev qos el geografııalyq jaǵynan alys bolǵanymen, ózara yntymaqtastyq pen damýdyń qarqyn alyp kele jatqanyn tilge tıek etti. «2018 jyldyń sońynda Japonııanyń Qazaqstanǵa quıǵan tikeleı ınvestısııasynyń kólemi 1,2 mlrd AQSh dollaryna jetkenin atap ótýge bolady», dedi ol.
Janbolat KENJEǴUL,
«Egemen Qazaqstan»