El Táýelsizdigi kúni qarsańynda Ulttyq ulan men Qazaq Ulttyq óner ýnıversıteti ózara memorandýmǵa qol qoıdy. Endigi kezekte elimizdiń ónerdegi eń beldi joǵary oqý oryndarynyń biri men quqyqtyq tártip áskeri Elbasy N.Á. Nazarbaevtyń «Bolashaqqa baǵdar: Rýhanı jańǵyrý» baǵdarlamalyq maqalasyndaǵy basymdyqtardy iske asyrý, sondaı-aq eldiń zııatkerlik elıtasyn qalyptastyrý, sapaly bilimdi qamtamasyz etý, óner salasynda bilikti mamandardy daıyndaý salasynda tıimdi yntymaqtastyqty jolǵa qoıý maqsatynda jumys jasamaq, dep habarlaıdy Ulttyq ulanynyń baspasóz qyzmeti.
Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov pen Qazaq Ulttyq óner ýnıversıtetiniń rektory Aıman Musahodjaeva kezdesý barysynda shyǵarmashylyq kókjıekteri týraly keńinen áńgime qozǵady. Atap aıtar bolsaq, taraptar memorandým aıasynda birqatar birlesken jobalardy qolǵa almaq. Ǵylymı-zertteý qyzmetinde birlesken ınnovasııalyq jobalardy ázirleý jáne ótkizý, ádistemelerdi, oqý quraldaryn ázirleý jáne synaý; eki jaqtyń sahnalarynda konserttik óner kórsetý; QazUО́Ý bilim alýshylarynyń Ulttyq ulannyń áskerı orkestrlerinde, án-bı ansamblinde, beıne stýdııa bólimshesinde taǵylymdamadan ótýi, ári qaraı túlekterdi jumysqa ornalastyrý suraqtaryn qaraý.
Biliktilikti arttyrý maqsatynda Ulttyq ulan áskerı orkestrleriniń, án-bı ansambliniń, beıne stýdııa bólimsheleriniń jáne klýbtarynyń mamandary óner ýnıversıtetinde oqytý kýrstarynan ótýge múmkindik almaq. Sondaı-aq kóshpeli sheberlik synyptaryn ótkizý de qarastyrylǵan. Taraptar tıisti qyzmet salalarynda jınaqtaǵan tájirıbelerimen bólisip, birlesken mádenı is-sharalar da ótkizbek. Munyń barlyǵy óz kezeginde Ulttyq ulan ónerin odan ári órge domalatýǵa sońy serpin beretini sózsiz.
Kezedesý sońynda general-maıor Muhametqalı Satov álemge áıgili óner tulǵasy, Qazaqstannyń halyq ártisi, óner ordasynyń basshysyna Ulttyq ulan Bas qolbasshysynyń atynan alǵysyn jetkizip, áskerdegi shyǵarmashylyqty damytýǵa qosqan úlesi úshin «Quqyqtyq tártip áskerine 25 jyl» mereıtoılyq medalimen marapattady.