Búgin Túrkistan oblysynyń ákimi Janseıit Túımebaev oblys ortalyǵy - Túrkistan qalasynyń ákimshilik-iskerlik ortalyǵynda boı kóterip jatqan 26 turǵyn úıdiń qurylys jumystarymen tanysty. 1536 páterden turatyn baspanalardyń 1200 páteri (20 turǵyn úı) arendalyq úıler bolsa, qalǵan 6 turǵyn úı, ıaǵnı 336 páter kredıttik baspanalar qatarynda, dep habarlaıdy Túrkistan oblysy ákiminiń baspasóz qyzmeti.
Irgetasy osy jyldyń qyrkúıek aıynda qalanyp, memlekettik bıýdjet esebinen salynyp jatqan 60 páterli 20 turǵyn úıdiń 11-i (660 páter) 2019 jyldyń sáýir aıynda tapsyrylady. Al 9 turǵyn úı (540 páter) keler jyldyń qarasha aıyna el ıgiligine berilmek. Kredıttik kópqabatty 6 turǵyn úıdiń (336 páter) qurylys jumystary 2019 jyldyń maýsym aıynda aıaqtalyp, paıdalanylýǵa tapsyrylady.
Jańa ákimshilik-iskerlik ortalyqta memlekettik-jekeshelik áriptestik arqyly 280 oryndyq jańa balabaqshanyń qurylysy da halyq ıgiligine tapsyryldy. Sondaı-aq 900 oryndyq mekteptiń esigin jańa oqý jylyna deıin ashý josparlanýda.
Jańa oblys ortalyǵy Túrkistan qalasynyń ákimshilik-iskerlik aımaǵynda qazir jańa ákimshilik ǵımaraty, basqarmalar jáne departamentter úıleri, sondaı-aq 5 juldyzdy «Rıksos» qonaq úıiniń qurylysy bastalyp ketti.