Qara kıik jylyna qadam basar tusta Rıdder qalasynda «Nurly jer» baǵdarlamasy aıasynda 120 otbasy qonys toıyn toılady.
Bıýdjettik mekemelerde qyzmet isteıtin mamandarǵa, áleýmettik jaǵdaıy nashar, kópbalaly otbasylarǵa jáne ata-ana qamqorlyǵynsyz qalǵan balalarǵa arnap salynǵan 60 páterli eki turǵyn úıdiń kiltterin qala ákiminiń orynbasary Evgenııa Nýjnyh pen «Nur Otan» partııasy Rıdder qalalyq fılıaly tóraǵasynyń orynbasary Nadejda Klımova tapsyrdy. «Bes qabatty úıde 5 úsh bólmeli, 35 eki bólmeli jáne 20 bir bólmeli páter bar. Balalar alańy, kólik qoıatyn oryn da qarastyrylǵan», - deıdi qalalyq qurylys, qala qurylysy jáne sáýlet bóliminiń basshysy Elena Maslakova.
Jastaıynan jetimdik qasiretin tartqan Natalıa Arapova bul sátti jeti jyl kútkenin aıtady. Ata-ana qamqorlyǵynsyz qalǵan balalardy tárbıeleıtin mektep-ınternat túlegi Ilıa Hýrtın baspana kezegine 1995 jyly turypty. Birneshe jyl buryn belgisiz sebeptermen kezekten alynyp ta qalypty. Úsh jyl buryn baspana kezegine ózin qaıta qostyrǵan azamat «óz úıi – óleń tósegine» qol jetkizgenine qýanyshty. Al mektepte eńbek etetin Dınara Qamzına 10 jyldan astam ýaqyt balalarymen birge páter jaldap, ózgeniń qas-qabaǵyna qarap kelipti. «Páterli boldyńyz dep telefon shalǵanda áýelde senbegenim ras. Qıyndyqtyń bári artta qalǵandaı» deıdi ol.
Qos úıdiń qurylysy osydan týra bir jyl buryn bastalypty. Jalpy, 2017 jyly Rıdderde 9436 sharshy metr turǵyn úı el ıgiligine berilipti.
Azamat QASYM,
«Egemen Qazaqstan»
Shyǵys Qazaqstan oblysy,
Rıdder qalasy