Jastar jylyna oraı bıyl Mańǵystaý oblysynda jas kásipkerlerge barynsha qoldaý kórsetilmek. Osy baǵyttaǵy jumysty jetildirý úshin jas kásipkerler qaýymdastyǵy qurylady. Bul týraly «О́ńirlik Kommýnıkasııalar qyzmeti» alańynda júrgizilgen brıfıng barysynda Mańǵystaý oblysy «Atameken» kásipkerlik palatasynyń dırektory Nurbek Qarasaev málim etti.
О́tken jyly kásip ashqan mańǵystaýlyqtarǵa 27 mlrd. teńge nesıe berilgen. Bul aldyńǵy jyldarmen salystyrǵanda 20 paıyzǵa kóp. Nesıe alǵandardyń basym bóligin jastar qurap otyr. Brıfıngke ótken jyly kásip ashyp, tabysty eńbek etip jatqan jas kásipkerler de qatysyp, ózderiniń tabys qupııalarymen bólisti.
2018 jyldyń esebi boıynsha aımaqta 51 myń shaǵyn jáne orta bıznes sýbektisi tirkelgen. Shaǵyn jáne orta kásippen aınalysatyn adamdar sany – 120 myń. Berilgen mıkronesıeler sany – 2,2 mlrd, bul kórsetkish te aldyńǵy jyldarmen salystarǵanda 2 esege artqan. Bıyl aýyl kásipkerlerin qoldaý úshin qazynadan 1 mlrd 400 mln teńge qarjy bólinbek. О́tken jylmen salystyrǵanda 20 prosentke kóp.
Palata dırektorynyń aıtýynsha, 2018 jyldyń qańtar-qarasha aılary boıynsha bólshek saýda aınalymy – 86 537 mln. teńgeni qurap, 2017 jylmen salystyrǵanda 101,1 % oryndalǵan, búginde oblysta 35 bazar ortalyǵy, 16 saýda ortalyǵy tirkelgen. Sondaı-aq, 2018 jyly kásipkerlik palatanyń quqyqtyq blogyna 382 quqyqtyq ótinim túsip, onyń 132-i kásipkerlik sýbektiniń quqyǵyna qatysty, 69 ótinimge oń baǵa berilip, 51 ótinimge túsindirme jumystary usynyldy, 12 ótinim qaralý ústinde. «Atameken» palatasynyń qoldaýymen quny - 2 mlrd. 199 mln. 449 teńge turatyn jobalardyń quqyǵy qorǵaldy.
Bıyl Mańǵystaý oblysynda aqpan aıynan bastap kásipkerlik skrınıng júrgiziledi. Bul jumystardyń alǵashqy kezeńine qazynadan 50 mln. teńge bólindi.
- Máselen, qus baǵyp, jumyrtqa óndirip otyrǵan nemese baqsha egip, ónim alyp otyrǵan azamattardy anyqtap, olarǵa qoldaý kórsetilmek. О́nimderin tapsyrýǵa kómektesemiz. Osylaısha turǵyndardyń kúndelikti tabysyn arttyryp, kásibiin dóńgeletýine qolushy beriledi. Bul aımaqtaǵy kásipkerlerdiń sanyn arttyryp, kóleńkeli bıznestiń aldyn alýǵa múmkindik beredi, dedi N.Qarasaev.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy