Bul týraly Parlament Májilisiniń jalpy otyrysynda QR Bas prokýrorynyń orynbasary Andreı Lýkın aıtyp ótti.
«Jalpy bizde 1 499 adam halyqaralyq izdeýde júr, al 1 026 memleketaralyq izdeýde qamtylǵan», - dedi A. Lýkın. Onyń aıtýynsha, ekijaqty kelisim bolmaǵan jaǵdaıda taraptar ózara ýaǵdalastyq tártibinde tıisti sheshimge keledi.
«Mundaı tájirıbeni kóptegen eldermen keńinen paıdalanyp kelemiz, onyń ishinde eýropalyq eldermen de iske asyrylýda. Mysaly, Germanııamen aradaǵy is-qımyl aıasynda ótken jyly olar bizge úsh adamdy ustap berdi. Sondaı-aq, biz tıisti konvensııalardy negizge alamyz, onyń ishinde Mınsk konvensııasy bar», - dedi ol.
Búgin Parlament Májilisiniń jalpy otyrysynda «Qazaqstan Respýblıkasy men Iordan Hashımıt Koroldigi arasyndaǵy adamdardy ustap berý týraly kelisimdi ratıfıkasııalaý týraly» zań jobasy maquldandy.