Bódene jumyrtqasynyń, etiniń adam aǵzasyna orasan zor paıdasy bar ekeni belgili. Ǵalymdar adamnyń oılaý qabiletin arttyryp, aǵzany túrli juqpaly aýrýlardan qorǵaıtynyn da jıi aıtady.
Osyny jaqsy biletin qostanaılyq Saqtaǵan bódene asyraýdy hobbıine aınaldyrypty.
Qaladaǵy balabaqshalardyń birinde jumys isteıtin Saqtaǵan Baqbasov búginde 400-ge jýyq bódene asyrap otyr. Mundaı kásippen aınalysýyna teledıdardan kórgen bir baǵdarlama áser etken eken. Onyń aıtýynsha, osydan 4 jyl buryn Reseıdiń Qorǵan qalasyna baryp, 15-ke tarta balapan satyp alǵan. Olarǵa arnap qora turǵyzyp, edenin gazben jylytylatyn etip jasaǵan. Aýa temperatýrasy da bir qalypty. Jeldetkishi jáne bar. Qustardy tordan jasalǵan arnaıy úıshikterge bólip qoıǵan.
– Sý avtomatty túrde kelip tur. Bódenelerim de buǵan ábden úırenip alǵan. Arnaıy jasalǵan shúmekti tumsyǵymen shoqyp qoıyp, sý ishe beredi (kúledi). Aldaryndaǵy jemsalǵyshty da ózim qoldan jasadym. Tańerteń jáne keshke bir retten jem beremin. Bódene kútimi kóp ýaqyt almaıdy. Bir qus táýligine bir jumyrtqa beredi, – deıdi Saqtaǵan.
Jaz aılarynda bódeneliniń sany 1000-ǵa jýyqtaıdy eken. Búginde tapsyrys arqyly et, jumyrtqa satyp alatyndar da kóbeıgen. Sondyqtan aldaǵy ýaqytta kásipkerlikti qoldaý mekemeleri arqyly shaǵyn nesıe alyp, bódene sharýashylyǵyn nyǵaıtý oıynda bar kórinedi.
P.S. Kúni keshe Instagram jelisinde jarııalanǵan jumyrtqanyń sýreti áleýmettik jelide laık jınaýdan rekord ornatqany belgili. Bul sýretke 30 mıllıonǵa jýyq adam laık qoıǵan. Alaıda...
Búgingi keıipkerimiz Saqtaǵan Baqbasov áleýmettik jelide mundaı fotolar júktemeıdi, laıkqa da muqtaj emes ekeni anyq.
Ǵanıbet ǴALYMBEKULY,
sýretterdi túsirgen Berdibolat KО́RKEMBAEV