Qaraǵandy oblysynyń Osakarov aýdanynda ashylǵan «Tatýlyq» medıasııa ortalyǵynda kásibı medıatorlar men el ishine syıly aqsaqaldar qyzmet etetin bolady.
Jańa ortalyq tusaý keskennen keıin Osakarov aýdanynyń ákimi Nurken Qobjanov pen aýdandyq sottyń tóraǵasy Nur Ábilhanov ózara áriptestik týraly memorandýmǵa qol qoıdy. Taraptardyń uıǵarymynsha, mundaı tájirıbe kez kelgen daýly máseleni sotqa jetkizbeı retteý úderisin belsendi damytýǵa septigin tıgizbek.
Sheshendik óneri jáne el arasynda bedeli bar aqsaqaldardyń adamdar arasyndaǵy daý-damaılardy sheshýde yqpaly zor dep esepteıdi medıasııa ortalyǵynyń mamandary. Ortalyq qyzmetine tek jeke tulǵalar ǵana emes, kompanııalar men bıznes boıynsha seriktester de júgine alady.
– Turǵyndar úshin kez kelgen daýdy sot qaraýyna deıin jetkizbeı sheshýge múmkindik týdy. Medıasııa janjaldardy beıbit túrde, eki jaqqa da jaǵymsyz saldarsyz sheshýge kómektesedi dep úmittenemiz, – deıdi aýdan ákimi Nurken Qobjanov.
Aıtsa aıtqandaı, atalǵan tájirıbe qazirdiń ózinde jemisin bere bastaǵan. Osakarov aýdandyq polısııa bóliminiń málimeti boıynsha, 2018 jyly medıatorlardyń kómegimen taraptardyń tatýlasýy arqasynda 10 qylmystyq is sotqa jetkizilmeı sheshimin tapqan.
Qaırat ÁBILDA,
«Egemen Qazaqstan»
Qaraǵandy