Halqymyz ejelden «Aýrý – astan» dep eskertip, bul sózdi «As – adamnyń arqaýy» dep qýattaǵan. Búgingi tańda taǵam túri kóp bolǵandyqtan da, keıbir adamdardyń tamaqtaný máselesinde qaıshylyqtar týyndap jatady. Al endi mektepte balalar ne iship, ne jep júr degen máseleniń árbir ata-ananyń kókeıindegi saýal ekeni túsinikti.
Shynynda, búginde memleket tarapynan balalardyń tıisti deńgeıde tamaqtanýy úshin mektepterge laıyqty qoldaý kórsetilip keledi. Alaıda kóptegen mektep ashanalarynda un ónimderi, quramynda qanty basym sýsyndar men túrli ónimderdiń kóp satylatyny jasyryn emes. Sonymen qatar, kóp jaǵdaıda jańa pisken jemister men kókónisterdiń jetkiliksiz mólsheri jáne ashana máziriniń normalary aıqyndalmaǵan bolyp shyǵady. Al, mektepterde balalardy tamaqtandyrýdy uıymdastyrýdaǵy keıbir kemshilikter, tamaq ishýge arnalǵan ýaqyttyń jetkiliksizdigi men mektep ashanalarynyń eskirgen materıaldyq-tehnıkalyq bazasy jáne keıbir mektepterde tipti ashanalardyń bolmaýy da kóńilge kirbiń uıalatatyny anyq. Bul oraıda, «Nur Otan» partııasynyń «Mektep ashanalary» jobasynyń óz jumysyn bastaǵany belgili. Al, partııa Jambyl oblystyq fılıalynyń uıymdastyrýymen, bul maqsatta sarapshy top qurylyp, Taraz qalasyndaǵy birqatar mektepterdiń ashanalaryn tekserip shyqty. Nátıjesinde, jetistiktermen qatar, birqatar kemshilikterdi de kórýge bolady.
Taraz qalasyndaǵy úsh tilde oqytatyn mamandandyrylǵan daryndy balalarǵa arnalǵan mektepte 485 bala bilim alady. Atalǵan mekteptiń dırektory Záýre Dúzenova balalardyń durys tamaqtanýy árdaıym basty nazarda ekenin aıtady. Munda bilim alyp júrgen balalar túski mezgildegi úziliste mektep ashanasynan tamaqtanatyn bolsa, oqýshylarǵa beriletin ystyq tamaq elimizdiń Bilim jáne ǵylym mınıstrliginiń bekitken talabyna saı eken. Al, oqýshylardyń ózderi de mektep ashanasynda tátti shaı, qaınatylǵan jumyrtqa, túrli ystyq tamaq, ıogýrt jáne balyq etinen jasalǵan kotlet beriletinin aıtyp berdi.
Erekshe daryndy balalarǵa arnalǵan oblystyq «Daryn» mektep-ınternatynyń balalary kúnine bes mezgil tamaqtanady eken. Mekeme basshysy Nazıra Shiltaevanyń aıtýynsha, munda 325 oqýshy bilim alady. Alaıda mektep ashanasy 130 oryndyq qana. Demek, balalar úsh topqa bólinip as ishedi degen sóz. Kelesi top kezek kútip qalmas úshin keıde balalardyń asyǵyp as ishýine de týra keledi. Endigi jerde mektep ashanasyn úlkeıtý máselesi týyndaıdy. Deı turǵanmen, aǵa aspaz Galına Motovılova oqýshylardyń durys tamaqtanýyna aspazdardyń da tıisti kóńil bólip otyratynyn jetkizdi.
Al, oblys ortalyǵyndaǵy №44 mektepte 1100 bala oqıdy eken. Sonymen qatar, munda áleýmettik jaǵdaıy álsiz, az qamtylǵan otbasynan shyqqan 207 balanyń tegin tamaqtanatyny qýantarlyq jaǵdaı. Taǵy júz bala osy jerden aqyly túrde as ishedi. Mektep ashanasy tıisti jabdyqtarmen jabdyqtalǵanymen, as ishetin aıaq-tabaqtyń eskiligi kózge birden kórinedi. Sonymen qatar, qol jýý bólmesinde arnaıy keptirgishterdiń bolmaǵany da birden baıqaldy. Sondaı-aq, mundaı jaǵdaı búgingi tańda 1413 bala bilim alatyn №7 orta mektepte de qaıtalandy. Biraq, bir qýantarlyǵy, 120 oqýshyǵa arnalǵan mektep ashanasynan 150 bala tegin ystyq tamaq ishedi eken. Al, mektep dırektorynyń orynbasary Gúlmıra Raıqulova tegin ystyq tamaq úshin árbir balaǵa 250 teńge bólinetinin aıtty. Aqyly túrde tamaqtanatyn ár balaǵa 200 teńgeden aınalatyn bolyp shyqty.
Búginde mektep ashanalaryna mán berý mańyzdy bolyp tur. Áıtpese, balaǵa bergenniń bári as. Olar tamaqtyń sapasyna da mán bere qoımaıdy. Al, keleshek urpaqtyń deniniń saý, ómir jasynyń uzaq bolýy búgingi amalǵa baılanysty ekenin umytpaý lázim.
Hamıt Esaman,
«Egemen Qazaqstan»
Jambyl oblysy