Shymkent qalasy bıýdjetiniń kiris bóligin ulǵaıtý boıynsha keńeıtilgen jıynda kásipkerlik maqsatta paıdalanyp otyrǵan nysandarǵa baqylaý kúsheıtilip, kóleńkeli ekonomıkamen kúresti belsendi júrgizý tapsyryldy. Bul týraly qala ákimi Ǵabıdolla Ábdirahymov «Shymkent qalasy respýblıkalyq mańyzy bar qala mártebesin alǵannan keıin aldaǵy úsh jylda dotasııalyq aımaqtan donorly aımaqqa aınalýy qajet» dep aıtyp ótti.
Shymkent qalasy boıynsha Memlekettik kirister departamentiniń basshysy Nuralhan Kósherovtiń aıtýynsha, ótken jylǵa salyqtyq tólemder boıynsha bekitilgen jospar 73 mlrd teńge bolsa, naqty 78 mlrd teńge túsken. 2017 jylmen salystyrǵanda túsimder 9,7 mlrd teńgege artyǵymen túsken.
Kezdesýde kóleńkeli ekonomıkamen kúresip, salyq túsimin arttyrý, barlyq kásipkerlerdiń jaldamaly jumysshylaryn tirketip, olardyń tabystaryn shynaıylyqqa keltirý máselesi áńgime boldy. Sondaı-aq jaldamaly jumysshylary úshin tólenetin áleýmettik, jeke tabys salyqtaryn ulǵaıtý, kásipkerlik maqsatta paıdalanyp otyrǵan nysandardyń baǵalaý qundaryna qaıta baǵalaý jumystaryn uıymdastyryp, múlik salyǵynyń túsimin arttyrýǵa basa nazar aýdaryldy.
Qazirgi tańda qalada 68 myńnan astam shaǵyn jáne orta bıznes sýbektisi bar. Osy kásipkerlik sýbektilerinen 2018 jylǵa memlekettik bıýdjetke 22,6 mlrd teńge túsken nemese jalpy túsimniń kórsetkishi – 15,8 paıyz ǵana bolǵan. Sondaı-aq múlik salyǵynan jaltarý úshin kásipkerlik maqsatta paıdalanatyn ǵımarattardyń quny aıtarlyqtaı az kórsetilgen. Osy oraıda departament basshysy kásipkerlerdi bir aı merzim ishinde naqty tabystaryn kórsetip, qosymsha salyq eseptilikterin tapsyrýǵa úndedi.
Nurshat TО́KEN,
«Egemen Qazaqstan»