Úkimettiń keńeıtilgen quramdaǵy otyrysynda Memleket basshysy aýyl sharýashylyǵy salasyna qajetti qarajatty bólýdi tapsyrdy.
«Aýyl sharýashylyǵy salasy bolashaqta ekonomıkany damytýdyń negizgi draıveri bolatynyn únemi aıtyp júrmiz. Barlyq elder ózderiniń jerlerin ıgerip boldy. Osy oraıda, tehnologııalyq jetistikterdiń eń joǵary shyńyna shyqty. Dúnıe júzindegi ıgerýge bolatyn qalǵan jer Qazaqstan, Reseı, Ýkraınada qaldy», - dedi Elbasy.
Budan ári Nursultan Nazarbaev eldegi aýyl sharýashylyǵy jerlerin tıimdi paıdalaný qajet ekenin aıtty.
«Eger de barlyq elder AQSh-taǵy sekildi azyq-túlikti kóbirek tutynatyn bolsa, álemdegi azyq-túlik 2,5 mlrd adamǵa ǵana jetedi. 2040 jyly Jer betinde 8,9 mlrd halyq bolady. Sondyqtan aýyl sharýashylyǵy ónimderine suranystyń artýyna baılanysty barlyǵy bizge keledi. Osy úrdisterge daıyndalý kerek. Aýyl sharýashylyǵy salasynyń áleýetine jekeleı qaraý qajet. Qansha qarjy kerek bolsa, sony bereıik. Biraq naqty nátıjege qol jetkizý kerek», - dedi Memleket basshysy.
Bul máseleni qadaǵalaýdy Elbasy Premer-Mınıstr Baqytjan Saǵyntaevqa tapsyrdy.
Marjan TILEÝBEK,
«Egemen Qazaqstan»