Aýdan ortalyǵyndaǵy Qanysh Sátbaev memorıaldyq mýzeıine 2013 jyly oblys ákiminiń bastamasymen kúrdeli jóndeý jumystary júrgizildi.
Mýzeı qaıta jabdyqtalǵan 2 zaldan, 60 oryndyq dáris zalynan turady. Al, ekinshi qabattaǵy qosymsha zalda ǵalymnyń týǵan qystaýy, balalyq, jastyq shaǵy, otbasylyq ómiri, Ulttyq Ǵylym Akademııasynyń prezıdenti bolyp saılanǵan ýaqytqa deıingi, odan keıingi ómir joldarynan maǵlumat beriledi.
Bul kúnderi mýzeı qorynda 3435 jádiger bar. Onyń 1400 jádigeri ekspozısııa zalynda qoıylǵan. Negizi mýzeı 1964 jyly Baıanaýylǵa stýdenttik qurylys otrıadynda bolǵan stýdent jastar bastamasymen ashyldy.
Memorıaldyq mýzeı qyzmetkeri Dana Nurbaevanyń aıtýynsha,bıyl Qanysh Sátbaevtyń týǵanyna 120 jyl tolýyna oraı Qaraǵandy oblysy О́lketaný-tarıhy mýzeıimen birlesip «Ǵasyrdyń bıik tulǵasy» atty arnaıy kórme, oqýshylar arasynda oblystyq ǵylymı tájirıbelik konferensııa ótkizilmek.
Sonymen birge, «Qanysh súıgen ásem ánder» atty óńirlik án baıqaýy, «Ǵalymnyń aty ólmeıdi» atty oblystyq jas aqyndar múshaırasyn ótkizý josparlanyp otyr.
Jýyrda mýzeıde ǵalymdy eske alý sharasy ótti. Rýhanı tanymdyq sharada jergilikti mektep oqýshylary Ábiken Arhat pen Rahymbekova Aıaýlym ǵalym atalaryna arnaǵan óleńderin oqydy. Aýyldyq mádenıet úıiniń kórkemdik jetekshisi Bolat Omarov Qanysh atamyz oryndaǵan súıip oryndaǵan 25 ánniń biri «Búrkitbaıdy» aıtyp berdi. Budan soń, Musa Shormanov aýylyndaǵy Q.Sátbaevtyń ata babasy jerlengen «Aıryq» jerine baryp quran baǵyshtap qaıtypty.
Farıda BYQAI,
«Egemen Qazaqstan»
Pavlodar oblysy