Memleket Basshysy Nursultan Nazarbaev Almaty oblysynyń aýyl sharýashylyǵy salasyndaǵy kóshbasshy aımaq ekenin ótkende Úkimettiń jalpy otyrysynda qaıtalap aıtyp, naqty baǵasyn berdi. Bul óńirdegi agrarlyq jumystardyń joǵary deńgeıde ekendiginiń dáleli. Qazir Jetisýda aýyl sharýashylyǵynyń «altyn dáýiri» bastaldy dese bolǵandaı.
Jalpy, Elbasy atap ótken agroónerkásip kesheni oblys ekonomıkasynyń negizgi draıverine aınaldy. Onyń bir mysalyn Almaty oblysynda óndirilgen aýyl sharýashylyǵy óniminiń úlesi tutas el boıynsha óndirilgen ónimniń 17 prosentin quraǵanynan anyq baıqaýǵa bolady. Qazir jetisýlyq agrarlar egistikti ártaraptandyrýdyń arqasynda qant qyzylshasynyń alqabyn 2000 gektarǵa, júgeri egistigin 1453 gektarǵa, jem-shóp daqyldaryn 1215 gektarǵa jáne kókónis ósirýdi 707 gektarǵa ulǵaıtty. Munan bólek, ejelden almanyń Otany atanǵan óńirde baý-baqsha egistiginiń kólemi de artty. Bir ǵana alma baqtarynyń alqaby 2,4 myń ga ulǵaıyp, ótken jyly óńirde 65 000 tonna alma jınalǵan eken. Sondaı-aq, aımaqtyń júgeri ósiretin sharýashylyqtary da ótken jyly rekordtyq ónim aldy. Máselen, Panfılov aýdanynyń júgeri alqaptarynda gektaryna 120 sentnerge deıin ónim jınalǵan. Bul jalpy oblystaǵy kórsetkishten 2 esege artyq eken.
Memleket Basshysy Nursultan Nazarbaev Úkimettiń keńeıtilgen otyrysynda Almaty oblysyndaǵy aýyl sharýashylyǵy salasynyń damýyna qatysty aıta kele «Sońǵy 5 jyl aralyǵynda aımaqta qant qyzylshasynyń egistigi 10 esege kóbeıdi» degen edi. Iаǵnı, óńirdiń agroónerkásip keshenindegi negizgi úles osy tátti túbir ósirýshiler men qant óndirisine buıyryp turǵanyn aıtýymyz kerek. Naqty derekke júginsek, ótken jyly oblys sharýalary 11200 gektarǵa tátti túbir tuqymyn seýip, odan 440 myń tonna qant qyzylshasyn jınady. Bul arǵy jylmen salystyrǵan 32 prosentke artyq. Al, oblys boıynsha jınalǵan qant qyzylshasynyń ortasha ónimdilik kórsetkishi 400 sentnerden aınaldy. Al jekelegen sharýa qojalyqtaryndaǵy túsim kórsetkishi Keńes odaǵy kezindegi rekordtyq kórsetkishten de asyp túsip, 800 sentnerge deıin jetken.
Árıne, tátti túbir tanaptarynyń jyl saıyn kóbeıýi aımaqtaǵy óńdeý óndirisine de jan bitirdi. Buǵan deıin oblysta jalǵyz ǵana qant zaýyty jumys istegen bolsa, ótken jyly taǵy bir óndiris iske qosyldy. Iаǵnı, Kóksý qant zaýytynyń múmkindigi sharalardyń qarqynyna tótep bere almaı, shırek ǵasyrǵa jýyq jumys istemeı turǵan Aqsý qant zaýytynyń jedel jańǵyrtylyp, iske qosylýyna ulasty. Nátıjesinde, oblysta bıyl 40 000 tonnadas astam taza qant ónimi shyǵaryldy. Al, Jetisý turǵyndarynyń táttige suranysy 30 000 tonna shamasynda eken. Demek, óńirdiń qant zaýyttary ishki naryqty tolyq qamtyp, endi búkil elge taza tabıǵı ónim túrin usyna bastady dep senimmen aıtýǵa bolady. Demek, tabys joly jalǵasa bermek. Oǵan negiz de bar. Úkimettiń jalpy otyrysynda Elbasy Nursultan Nazarbaevtyń saýalyna oraı «Keleshekte taǵy eki qant zaýyty, Qarabulaq, Alakól qant zaýyttaryn iske qosý josparlanyp otyr. Qazir ınvestorlarmen kelissózder júrgizilýde» degen bolatyn oblys ákimi Amandyq Batalov. Endigi bul baǵyttaǵy jumystar qarqyn aldy.
- Jýyrda Elbasy Úkimettiń keńeıtilgen keńesin ótkizip, aımaqtardyń damýyna erekshe nazar aýdaryp, mindetter júktedi. Soǵan sáıkes oblystyń ekonomıkalyq damý múmkindikterin odan ári keńeıtýimiz qajet. Kóksý men Aqsý qant zaýyttaryn iske qostyq. Olar jınalǵan ónimdi qazirge deıin óńdep jatyr. Erteń ırrıgasııalyq júıeler qalpyna keltirip, sýarmaly jerlerdiń kólemi artqan kezde, qant qyzylshasy taǵy da alqaby ulǵaıady, sonda bul eki zaýyttyń qýattylyǵy bizge azdyq ete bastaıdy. Sol úshin aldaǵy ýaqytta Alakól jáne Qarabulaq qant zaýyttaryn qaıta jańǵyrtsaq, odan basqa taǵy bir qant zaýytyn salsaq degen josparymyz bar. Elbasy ımportty azaıtyp, eksportty ulǵaıtý týraly tapsyrma berdi. Jetisý sharýalary bul údeden shyǵyp, ekonomıkanyń gúldenýine úles qosa beredi, - deıdi aımaq basshysy Amandyq Batalov.
Qalmahanbet MUQAMETQALI,
«Egemen Qazaqstan»
Almaty oblysy