Tarbaǵataı aýdanynyń Aqsýat aýylynda qusbegilikten Qazaqstan Respýblıkasynyń HIII chempıonaty ótýde. Aýdannyń kásipkerleri, Erlan Sydyqov, Bádelhan Sabýrov sııaqty azamattardyń qoldaýymen jáne «Shyǵys-Altaı» búrkitshiler federasııasynyń uıymdastyrýymen ótip jatqan saıysqa elimizdiń 12 oblysynan qusbegiler (40 búrkit, 3 qarshyǵa, 4 ıtelgi) qatysyp, jarystyń kórigin qyzdyrýda.
Keshe qatysýshylar qyran qustardy qolǵa shaqyrý, erkin ushyrý, búrkitti shyrǵaǵa salý, suńqarlardy dalbaıǵa shaqyrý syndy kezeńderden turatyn qyzyqty sátterdi jurtshylyq nazaryna usynsa, búgin búrkitti áýeli qoıanǵa, sońynan fınalǵa ótkenderdi túlki men qasqyrǵa, qarshyǵa, suńqarlardy kepter men qyrǵaýylǵa salý saıystary uıymdastyrylady dep kútilýde.
Osy jarysty tamashalaý úshin Tarbaǵataıǵa attanǵan óskemendik áriptesimiz Murathan Kenjehanulymen uıaly telefon arqyly habarlasqanymyzda 40 búrkittiń 13-i fınalǵa ótkenin aıtty.
Esterińizge sala keteıik, búrkitshilerdiń sońǵy úsh chempıonaty da bizdiń oblysta ótken bolatyn. 2016, 2018 jyldary Úrjar, 2017 jyly Aıagóz aýdanynda uıymdastyrylǵan-dy. «Qusbegilerdiń chempıonatyn Tarbaǵataı aýdanynda alǵash ret uıymdastyryp otyrmyz. Ulttyq dástúrimizge jurttyń qyzyǵýshylyǵy, ynta-yqylasynyń zor ekenin baıqadyq. Sondyqtan aldaǵy jyly osy chempıonatty halyqaralyq deńgeıde, ıaǵnı Yrǵyzbaı Doshanauly atyndaǵy halyqaralyq búrkitshiler saıysy dep ótkizsek pe degen oıymyz bar. Sonymen qatar aýdandaǵy О́ner mektebi ishinen búrkitshiler synybyn ashýdy josparlap otyrmyz», - deıdi Tarbaǵataı aýdanynyń ákimi Dildábek Orazbaev.
Azamat QASYM,
«Egemen Qazaqstan»
Shyǵys Qazaqstan oblysy, Tarbaǵataı aýdany