Elbasy Nursultan Nazarbaevtyń «Uly dalanyń jeti qyry» atty maqalasynda tórt túliktiń tóresi – jylqy jaıy jan-jaqty aıtylǵan bolatyn. Ilkidegi tarıhy, ilkimdi mádenıeti de. Tek sońǵy jyldary tehnıka qudireti basym túsip, jelmen jarysqan júıriktiń baǵy qaıta bastady. Qalanyń bozbalasy túgil, jylqy ishinde ósken aýyl balasy da atqa minbeıtin boldy. Kóneniń kórnekti qasıetine jan bitirý ótkenmen qatar búginniń de kóp kádesine jarar edi.
Taıaýda Aqmola oblystyq ishki saıasat basqarmasynyń qoldaýymen «Rýhanı jańǵyrý» baǵdarlamasynyń óńirlik jobalyq keńsesiniń uıymdastyrýymen Zerendi aýdanynyń Sáken Seıfýllın aýylynda «Taı – atqa, at – muratqa jetkizer» atty jabaǵy úıretýden estafetalyq baıqaý ótkizildi. Erejege sáıkes 5-8 synyp aralyǵyndaǵy onnan astam oqýshy ózara baq synasty.
Tuńǵysh ótkizilgendikten be eken, bul bir eldiń delebesin qozdyrǵan qyzyq jarys boldy. Tamashalaýǵa taıaǵyna súıenip qarııalar da kelipti. Jylqy jalynda ósken jurttyń ilkidegi ǵajaıyp qasıetiniń juqanasy áli bar eken. Aýyl balasy ámanda pysyq. Úrke shapshyp, júgen-noqtany basyna tıgizgisi kelmeı shortandaı shapshyǵan kúıli jabaǵylardy áp-sátte qulaǵynan basyp ustap, qýtyńdap júr.
Tamashalaýǵa kelgen halyqtyń atoılaǵan úninen qulaq tunady. Aspanǵa qarǵyp, jerge túsken, basyn eki aıaqtyń ortasyna tyǵyp alyp týlaǵan asaý jabaǵydan qulamaı qalǵandary da, týlasyna shydaı almaı top etip jyǵylǵandary da boldy. Bas-aıaǵy birneshe saǵatqa sozylǵan baıqaý qorytyndysyn bilýge asyqqan halyq aýyldyń mádenıet úıine jınaldy. Jabaǵyǵa bas bildirip, jalyna jabysyp, júldeger atanǵandarǵan arnaıy dıplom men syılyqtar tabys etildi.
Joǵaryda bir sózimizde bul jarysty estafetalyq baıqaý dep ataǵan bolatynbyz. Kelesi kezek Birjan sal aýdanynda.
Baıqal BAIÁDIL,
«Egemen Qazaqstan»
Zerendi aýdany,
Aqmola oblysy