Rıdder qalasyndaǵy órt sóndirý bóliminde 5 jyldan beri jumys isteıtin Rýstam Konbaev byltyr qara kúzde úıi órtenip ketip, úsh balasymen dalada qalǵan bolatyn.
«29 qazannan 30 qazanǵa qaraǵan tún áli esimizden ketpeıdi. Oıana kelsek, úıdiń ishi kók tútin. О́rt esikke barar joldy jaýyp tastaǵanyn kórip, balalardy terezeden shyǵarýǵa týra keldi» dep eske alady sol shaqty qutqarýshy.
Rıdderlikter Rýstamdy jumysynda ǵana emes, ómirde de aınalasyna beı-jaı qaramaıtyn azamat retinde erekshe qurmetteıdi. Ol tórt jyl buryn bulannyń jetim qozysyn taýyp, aman alyp qalsa, taǵy birde jalǵyz ózi kórshisiniń úıin órtenip ketýden saqtapty. Byltyr kóktemde qutqarý sharalaryna bara jatqanda mashınalary aýdarylyp, ózi de bir ajaldan aman qalypty. Qaısar jigit jarty jyldaı em-dom alǵannan keıin jumysyna qaıta oralypty. «Kún saıyn otpen, sýmen alysyp, bizdiń tynyshtyǵymyz ben qaýipsizdigimiz úshin ter tógip júrgen osyndaı elin, jerin súıetin azamattyń baspanasyz qalǵanyn estigende qol qýsyryp otyra almadyq. Kómek kórsetýdi, járdemdesýdi jón sanadyq», - deıdi «Qazsınk» JShS ákimshilik máseleler jónindegi atqarýshy dırektory Andreı Lazarev.
Rýstam kásiporyn tarapynan berilgen qomaqty qarjyǵa ózderiniń jıǵan-tergenderin qosyp, tórt bólmeli páter satyp alǵanyn aıtyp, kómek qolyn sozǵan óndiris orny basshylyǵyna alǵysy sheksiz ekendigin jetkizdi.
Azamat QASYM,
«Egemen Qazaqstan»
Shyǵys Qazaqstan oblysy, Rıdder qalasy