Semeı qalasynyń ákim Ermak Sálimov halyqqa asa qajetti azyq-túlik ónimderiniń baǵasy qoljetimdi me sony bilý úshin saýda ortalyqtary men dúkenderdi, tipti bazarlardy aralap shyqty. Sóıtse, bazardaǵy kókónister baǵasy turaqtandyrý qorynyń baǵasynan áldeqaıda qymbat eken. Qala ákiminiń tekserýinshe, sýpermarketter ónimderdi keıde ózimizde bolsa da, basqa qaladan satyp alady da, bul jetkizilgenshe onyń qymbattaýyna ákep soqtyrady. Sóıtip, halyqtyń qaltasynan qaǵylýyna aparady.
Ermak Sálimov óndiristen shyqqan taýardyń dúken sóresine jetkende tym qymbattap ketetindigine nazar aýdardy. Sondyqtan da qala basshysy saýda oryndarynan baǵa turaqtylyǵy men qoljetimdigi týraly resmı qujattar, esepter alýǵa tapsyrma berdi.
- Baǵany aqqula tym sharyqtatýdyń qajeti joq,-dedi ákim Ermak Sálimov,-kún saıyn taýar baǵasynyń monıtorıngin jasap otyryńyzdar.
Semeı qalasynyń aqparattyq ortalyǵynyń mamandary habarlaǵandaı, kásipkerlik bólimi basshysynyń esebin tyńdaǵan Ermak Sálimov renishin jasyrmaı otyr eken.
- Sizderdiń jumystaryńyzǵa kóńilim tolmaıdy. Keıbir azyq-túlikterge baǵa qymbattatylyp qoıylǵan. О́zderińiz dúkenge barasyzdar ma? Qarapaıym halyq qalaı kún kórip otyr dep oılaısyzdar? Júrińizder, dúkenge birge baraıyq. Nege uıaly telefondaryńyzǵa túsirip, birden qymbat baǵa ustap otyrǵan saýda dúkenderiniń ıelerine jiberip, tártipke shaqyrmaısyzdar? Bir taýardyń baǵasy eki dúkende eki túrli, bul qalaı?
Aldaǵy ýaqytta Ermak Sálimovtyń tapsyrmasymen saýda oryndary men bazarlarda kún saıyn taýar baǵasyna monıtorıng júrgizetin jumys toby qurylatyn boldy.
Raýshan NUǴMANBEK,
«Egemen Qazaqstan»
SEMEI