Bul – astanalyqtardyń ómir súrý sapasyn jaqsartýǵa baǵyttalǵan strategııalyq qujattar, dep habarlaıdy elorda ákimdiginiń resmı saıty. Halyqqa esep berý kezdesýinde elorda ákimi Baqyt Sultanov Astananyń erekshe qala ekendigin atap ótip, ákimdiktiń ony odan da jaıly etý úshin bar kúshin jumsaýy kerektigin aıtty.
«Burynǵy qarjy mınıstri retinde maǵan óz esebimdi ádettegideı sandardan bastaǵan yńǵaıly. Alaıda, qalanyń turmys-tirshiligi men ekonomıkasy – bul, birinshi kezekte, adamdar. Sol sebepti biz Astananyń 2050 jylǵa deıingi damý strategııasy jáne qala damýynyń jospary sııaqty eki qujatty ázirleýge kiristik», dedi B. Sultanov.
Onyń aıtýyna qaraǵanda, Strategııa bizge baǵyt-baǵdar kórseter qujat bolsa, ekinshisi – mejege qalaı qol jetkizetindigimizdiń egjeı-tegjeıli jospary.
«Elbasy halyqpen keri baılanys ornatý kerektigine únemi nazar aýdarady. Tek jyl basynan aýdan ákimderi men qala ákimi orynbasarlarynyń 33esep berýi kezdesýi ótti. Árıne, jeke kezdesý degen eń tıimdi format bolmaǵan soń, biz iKomek qyzmetin qurdyq. О́tken jyly qyzmetke 1 mln ótinim kelip tússe, olardyń shamamen 100% oryndalǵan. Bul – keremet kórsetkishter. Kómek qyzmetin paıdalanýshylar da, ortalyqtyń jumysyna jaýaptylar da jaraısyzdar!», dedi Sultanov.
Onyń aıtýynsha, ákimdikterdegi, basqarmalardaǵy ashyq esik kúnderi men iKomek qyzmetine túsken habarlamalar, áleýmettik jeliler arqyly túsken shaǵymdar, osylardyń barlyǵy qala ákimi men onyń tobyna qalalyqtardy jaqsy túsinýge kómektesedi.
«Men sizderden bizdiń jumysymyzǵa qatysty pikirińizdi belsendi túrde bildirýińizdi jalǵastyrýyńyzdy suraımyn. Jaǵdaılaryńyzdy túsinemin. Men sizderdiń túsirgen árbir shaǵymyńyz jaıly bilemin. Máseleler óz sheshimin tabatyn bolady. Árıne, onyń barlyǵy bir sátte sheshilmegenimen, ýaqyt óte kele biz ár máselege jetetin bolamyz», dedi Sultanov.