Astana ákimdigi jastarǵa arnalǵan arnaıy qujat daıyndady.
«Astana – túrli daryndar men talanttardyń ordasyna aınalýy kerek. Bul Elbasymyzdyń artyp otyrǵan mindeti. Jaqynda Jastar isi jónindegi keńestiń jıynyna qatystym. Onda jastarmen pikirlesip, túrli múmkindikterdi ekshedik, mańyzdy basymdyqtardy anyqtadyq. Sóıtip, Elbasymyzdyń bizge qoıǵan talaptaryna saı, «Astana jastary-2019» jol kartasyn ázirledik», dedi B.Sultanov.
Onyń aıtýynsha, qujatqa engen sharalar jastardy durys baǵytqa jeteleý jáne boıyndaǵy talantyn tanyp, tamyryn jaıýyna jaǵdaı jasaý.
«Bıyl «Jastar» saraıyn qaıta jasaqtaımyz. Ol jastardyń memlekettik organdarmen janasý núktesine aınalady. Jalpy tabysy eń tómen kúnkóris deńgeıinen aspaıtyn kóp balaly otbasylardan shyqqan balalar úshin Astana qalasynyń joǵary oqý oryndarynda oqýǵa jekelegen granttar beriletin bolady», dedi qala ákimi.
Sondaı-aq Baqyt Sultanov tehnıkalyq jáne kásiptik bilim berý mekemelerinde talap etiletin jumys mamandyqtaryn alý úshin qosymsha 1 myńnan astam grant kózdelgenin sóz etti.
«Oqý ýaqytynda jataqhanada turýdy, tegin jol júrý men tamaqtanýdy, stıpendııa tóleýdi qamtıtyn tolyq áleýmettik paket bar. Jastar tájirıbesi baǵdarlamasy boıynsha JOO túlekteri jumysqa ornalasa alady. Al Bıznestiń jol kartasy boıynsha jastar kásipkerlik oqýdan ótip, barlyq qajetti keńes ala alady jáne jeńildikti nesıeleýdi sýbsıdııalaý baǵdarlamasynyń qatysýshysy bola alady», dedi B.Sultanov.