Qyzylorda oblysynyń bes júzden astam túlegi Reseıdiń tehnıkalyq oqý oryndarynda tegin bilim alyp jatyr.
Reseı Federasııasy esebinen grantpen oqyp jatqan bul jastardyń deni oblys ákimdiginiń qoldaýymen qalaǵan oqý ornyna qol jetkizgen.
Búginde olardyń aldy oqýyn bitirip, elge oralyp qyzmet alýda. Solardyń qataryndaǵy Gúlsezim Raýshan Máskeýdiń Ulttyq tehnologııalar ýnıversıtetiniń túlegi.
- Oblys ákimi Qyrymbek Kósherbaev, onyń orynbasarlary, basqarma basshylary Máskeý nemese Sankt-Peterbýrgke saparmen kele qalsa, syrboıylyq stýdentterge soqpaı ketpeıtin. Bizben áńgimelesip, jaǵdaıymyzdy suraıdy. «El senderge senip otyr, Otanymyzdyń gúldenýine úles qosyp, qyzmet qylasyńdar» dep bizdi qaırattandyrady. Týǵan jerimizdi saǵynyp júrgen bizge osylaı úlken qoldaý bildirip, boıymyzǵa qýat bitiretin. Sapaly bilim alýǵa múmkindik berdi. Endi eńbek etýimiz kerek, – deıdi Gúlsezim.
Búginde ol Jańaqorǵan aýdanyndaǵy «SKZ-U» seriktestiginde jumys isteıdi. Syrda týyp, álemdegi myqty memleketterdiń birinde bilim alǵan jastar osylaısha eline eńbegin sińirip jatyr.
Baqtııar TAIJAN,
«Egemen Qazaqstan»
Qyzylorda oblysy