Qazaqstannyń tanymal kásipqoı bylǵary qolǵap sheberi Álı Ahmedov 24 naýryzda AQSh-tyń Golıvýdynda ótetin «Hollywood Fight Nights» boks keshine qatysady.
Osy jarysta jerlesimiz 37 jastaǵy jergilikti boksshy Maık Gaımen judyryqtasady. Amerıkalyq sportshynyń kásipqoılar arasynda kúsh synasyp júrgenine 10 jyl boldy. Sol aralyqta ol 13 kezdesý ótkizip, 9 ret jeńiske jetti. 5 básekeni merziminen buryn aıaqtady. 3 ret utylyp, taǵy bir jekpe-jekte teń esep tirkeldi.
Almaty oblysynyń týmasy Álı Ahmedov 23 jasta. Onyń kásipqoı rıngte júrgenine úsh jylǵa jýyqtap qaldy. Sol aralyqta 13 jekpe-jek ótkizip, barlyǵynda basymdyq tanytty. 10 kezdesýde qarsylastaryn esinen tandyrdy. Taıaýda ǵana ol WBC nusqasy boıynsha jastar arasynda álem chempıony atanǵan bolatyn. Bul – Álıdiń sýper orta salmaqtaǵy alǵashqy aıqasy.
Ǵalym SÚLEIMEN,
«Egemen Qazaqstan»