Qaraǵandyda Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qaraǵandy oblystyq departamentinde sybaılas jemqorlyq quqyq buzýshylyqtary boıynsha ákimshilik praktıkanyń nátıjeleri taqyrybynda brıfıng ótti.
Oǵan atalǵan departament basshysynyń orynbasary Tanat Medet, Sybaılas jemqorlyqtyń aldyn alý basqarmasynyń basshysy Baýyrjan Hýsaınov jáne «Saryara – adaldyq alańy» jobalyq keńsesiniń basshysy Malıka Kýsenbaeva qatysty.
Sybaılas jemqorlyqqa qarsy 2015-2025 jyldarǵa arnalǵan strategııada kózdelgen sybaılas jemqorlyqtyń aldyn alý sharalaryn jandandyrýǵa basa nazar aýdarý qajettiligi kórsetilgen. Osy oraıda, brıfıngte sóz alǵan qatysýshylar memlekettik qyzmet isteri jáne sybaılas jemqorlyqqa qarsy is-qımyl jónindegi ýákiletti organ úshin qylmystyq qýdalaý emes, sybaılas jemqorlyq kórinisteriniń sebepteri men jaǵdaılaryn aıqyndaýǵa jáne ony joıýǵa baǵyttalǵan aldyn alý sharalaryn ótkizýge basymdyq berilip otyrǵanyn atap ótti.
Osyǵan oraı, memlekettik qyzmet isteri jáne sybaılas jemqorlyqqa qarsy is-qımyl jónindegi ýákiletti organǵa birneshe bap boıynsha ákimshilik hattama toltyrý quqyǵy berildi. Mysalǵa alsaq, Qaraǵandy oblysy boıynsha Memlekettik kirister departamentinen túsken materıaldar negizinde jyl basynan bastap atalǵan kodekstiń eki baby, ıaǵnı, 676-shy jáne 681-baptar boıynsha ákimshilik hattamalar toltyrylǵan.
Atap aıtqanda, Qaraǵandy oblysy boıynsha Memlekettik kirister departamentine qarasty aýdandyq basqarmalarynyń qyzmetshilerine zańsyz aqshalaı syıaqy usynǵany úshin oblysymyzdyń eki azamaty kodekstiń 676-baby boıynsha ákimshilik jaýapkershilikke tartyldy. Atalǵan faktilerdiń birinde jeke tulǵalar jeke kásipker retinde tirkelý jáne satý bólimshesin ashý rásimi týraly berilgen keńes úshin alǵys retinde aqsha usynsa, ekinshisinde, patentti tirkeý jáne jeke tasymaldaý boıynsha bıznes ashý týraly keńes bergeni úshin aqshalaı zańsyz syıaqy bergen. Memlekettik qyzmetshilerge zańsyz syıaqy usynǵany úshin eki azamatqa jalpy kólemi 589 200 teńge kóleminde aıyppul salynǵan.
Sonymen qatar, Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamentiniń qyzmetkerlerimen júrgizilgen taldaý nátıjesinde, Shet aýdanyndaǵy bir mekemeniń basshysy buryn sybaılas jemqorlyq qylmys jasaǵan adamdy jumysqa qabyldaǵany úshin kodekstiń 681-babyna sáıkes ákimshilik jaýapkershilikke tartylyp, 126 250 teńge kóleminde aıyppul tóledi degen málimet keltirdi brıfıng qatysýshylary.
Osyndaı quqyq buzýshylyqtardy memlekettik qyzmetshilerdiń habarlaýy atalǵan departamentpen birge oblystaǵy memlekettik organdarda úzdiksiz júrgizilip otyrǵan sybaılas jemqorlyqqa qarsy aǵartý jumystarynyń naqty nátıjesi dep aıtýǵa bolady.
Qaırat ÁBILDA,
«Egemen Qazaqstan»
Qaraǵandy