Otandyq medısınanyń áleýeti artyp keledi. Oǵan bir dálel, ótken jyly Shymkent qalalyq №1 klınıkalyq aýrýhanasyna 17 sheteldik azamaty jergilikti hırýrgtardyń kómegine júgingen. Alys-jaqyn shetel azamattary aǵza múshelerine sapaly transplantasııa operasııasyn jasatý úshin úshinshi megapolıske arnaıy kelgen. Em alýshylardyń ishinde densaýlyq saqtaý salasy damyǵan Germanııa, Kanada, Izraıl jáne Rýmynııa elderiniń azamattary da bar.
«Sheteldik azamattar bizge ózderiniń donorlarymen keledi. Qazaqstandyqtar aǵza múshesin donor retinde usynǵan jaǵdaı bolǵan joq. Bizdiń maqsatymyz – medısınalyq týrızmdi damytý», deıdi Shymkent qalalyq №1 klınıkalyq aýrýhana bas dárigeriniń orynbasary Abylaı Donbaı.
Búginge deıin munda búırek almastyrýǵa qatysty 145, baýyr almastyrý boıynsha 19 operasııa jasalǵan. Dárigerlerdiń aıtýynsha, olardyń barlyǵy sátti aıaqtalyp, naýqastar ózderin jaqsy sezinýde. Aq halattylar mundaı nátıjege medısınalyq qyzmet sapasyn jaqsartýǵa baǵyttalǵan memlekettik baǵdarlamalar nátıjesinde qol jetip otyr deıdi.
Transplantalogııalyq operasııalardy jasaıtyn klınıka zamanaýı medısınalyq quraldarmen jabdyqtalǵan. Mundaǵy mamandarda bilimdiligimen qatar bilikti. Medısınalyq uıymda 7 bloktan turatyn operasııa jasaý bólimi men búırek pen baýyr almastyratyn hırýrgııa bólimi bar. Al emdelýshiler úshin stasıonarda qosymsha 45 tósek-oryn qarastyrylǵan. Kúndelikti aýrýhanaǵa 200-250 naýqas medısınalyq kómekke júginedi eken.
Nurshat TО́KEN,
«Egemen Qazaqstan»
Shymkent