Qostanaıdaǵy «SaryarqaAvtoProm» zaýyty konveıerinen shyqqan avtobýstar Atyraý qalasy ishindegi baǵyttarmen jolaýshy tasymaldaıtyn bolady. Zaýyttan 50 avtobýsty «Tengızshevroıl» kompanııasy Atyraýdyń avtoparkin jańartý úshin satyp aldy. Kelisim boıynsha Ankai markaly 30 avtobýs Atyraýǵa jetkizilip te berildi. Munyń syrtynda «SaryarqaAvtoProm» zaýyty men Atyraý qalalyq ákimdiginiń arasynda gazben júretin taǵy da 150 avtobýsty «BRK-Lızıng» AQ avtoparkin jańartý baǵdarlamasy boıynsha alý jóninde memorandýmǵa qol qoıyldy. Atyraýlyqtar elektrmen júretin avtobýsty synaýdy da josparlap otyr. Eger unasa qala ishilik baǵyttarǵa qanatqaqty jobamen 10 avtobýs alyp kórmek.
Qostanaıdan shyqqan avtobýstarǵa múmkindigi shekteýli jandar arbamen minip túsý úshin arnaıy pandýs ornatylǵan. Sonymen qatar jańa kólik zamanaýı tehnıkalyq talaptardyń barlyǵyna jaýap beredi.Ishi qys aılarynda jyly, jazda jeldetkishi jumys isteıdi. Beınebaqylaýy da bar. Avtobýsqa 86 jolaýshy syıady, kóliktiń uzyndyǵy 10,5 metr.
Názıra Járimbet,
«Egemen Qazaqstan»
Qostanaı