Qurlyqtyq hokkeı lıgasynyń (QHL) pleı-off kezeńine shyqqan elordanyń «Barys» hokkeı klýby Gagarın kýbogynyń 1/8 fınalynda Tómengi Novgorodtyń «Torpedo» komandasymen kezdesip, alǵashqy oıynda iri eseppen jeńiske jetti.
On myńǵa jýyq jankúıerdiń qoldaýymen «Barys Arena» muzaıdyn saraıynda ótken kezdesýde «Barys» komandasy jankúıerler kútkendeı match basynda oıyn tizginin óz qolyna alyp, pleı-off kezeńiniń kelesi satysyna shyǵýdy aldyna maqsat etip qoıǵany anyq baıqaldy. Tipti, matchtyń besinshi mınýtynda Mettıý Frettın «Torpedo» qaqpashysy Brast Barrımen birge-bir shyqqan bolatyn, biraq Barrı sheberligimen kózge túsip, qaqpasyn goldan saqtap qaldy. Matchtaǵy esepti birinshi bolyp qonaq komanda ashty. Oıynnyń 12-mınýtynda «Torpedo» oıynshysy Robert Sabolıch mergendigimen kózge túsip, komandasyn esepte alǵa shyǵardy. Jerlesterimiz birinshi kezeńde esepti teńestirýge tyrysyp baqqanymen, qarsylastar shaıba soǵýǵa múmkindik bergen joq.
«Barys» hokkeıshileri ekinshi kezeńiniń orta tusynan bastap qarsylas komandanyń qaqpasyna qaraı shabýyldy qarsha boratty. Tipti, tablodaǵy kórsetkish 0:1 emes, 10:1 nátıjesimen «Barys» paıdasyna sheshilýi múmkin edi. Biraq «Torpedo» qaqpashysy Brast Barrıdiń sheberligin erekshe atap ótý kerek. «Barystyń» ekinshi kezeń boıy tynymsyz shabýylynyń nátıjeli aıaqtalýyna Barrı múmkindik bermedi. Ol qaqpasyna birde-bir shaıba ótkizgen joq. «Barys» oıynshylary ekinshi kezeńniń sońǵy mınýtynda esepti teńestirýge múmkindik aldy. Shaıba avtory – Andre Petersson.
Úshinshi kezeńde de oıyn tizginin qolǵa alǵan elorda komandasy 42-mınýtta óz degenine jetip, Brendon Bochenskıdiń soqqan shaıbasynyń nátıjesinde esepte alǵa shyqty. Arada eki mınýt ótkende Mettıý Frettın mergendigimen kózge túsip, komandasynyń úshinshi shaıbasyn soqty. «Barystyń» basymdyǵymen ótken kezdesýdiń núktesin 56-mınýtta komanda kapıtany Brendon Bochenskı qoıdy. Qorytyndy esep – 4:1, «Barystyń» paıdasyna.
Búginge deıin eki klýb turaqty birinshilik aıasynda ózara 24 kezdesý ótkizdi. Sonyń 11-inde «Barys» basymdyq tanytqan bolatyn. Qalǵanynda «Torpedonyń» asyǵy alshysynan tústi. Aıta ketý kerek, elordalyqtar 8 márte negizgi ýaqytta jeńiske jetse, eki oıynda overtaımda basym túsken. Al bir kezdesýde «Barys» býllıt serııasy boıynsha utqan bolatyn. Elorda komandasy qarsylas qaqpasyna 71 shaıba soqsa, «Torpedo» oıynshylary 68 márte mergendik tanytqan. Eki komanda sońǵy ret byltyr 14 qyrkúıekte kezdesip, «Barys Arenada» ótken matchta elordalyqtar 4:1 esebimen jeńiske jetken edi.
Eki komanda arasyndaǵy pleı-off kezeńiniń ekinshi kezdesýi búgin «Barys Arena» muzaıdyn saraıynda ótedi. Qalǵan eki oıyn 2 jáne 4 naýryzda Tómengi Novgorodta ótedi. Aıta keteıik, pleı-off kezeńi eki komandanyń biri tórt ret jeńiske jetkenge deıin jalǵasady.
Álı BITО́RE,
«Egemen Qazaqstan»