Batys Qazaqstan oblysynda «Kóktem-2019» respýblıkalyq komandalyq-shtabtyq oqý-jattyǵýy ótti. Búkil elimiz boıynsha uıymdastyrylǵan bul synaq óńirdegi basqarý organdarynyń, azamattyq qorǵanys qyzmetteriniń, kúshteri men quraldarynyń kóktemgi kezeńge daıyndyǵyn qamtamasyz etýdi kózdeıdi.
Bıyl óńirde qar óte kóp. Sınoptıkter bıylǵy qysty «sońǵy 30 jyl ishindegi eń qary kóp maýsym» dep otyr. Kúntizbede kóktem kelip qalǵanymen, kún saıyn jaýǵan qar men soqqan boran eldimekenderdiń qoıny-qonyshyn qarǵa toltyryp, joldardy bógep, el-jurtty ábigerge salyp qoıdy. «Munsha qar erigen kezde sýǵa ketip qalmaımyz ba?» dep qaýiptengen tótenshelikter daıyndyǵyn barynsha pysyqtap jatyr.
Oqý-jattyǵý barysyn Oral qalasynyń irgesindegi «Dýbrava» kesheni aýdanynda Batys Qazaqstan oblystyq Tótenshe jaǵdaılar departamenti bastyǵy general-maıor J.Jumashev, oqý-jattyǵýdy basqarý shtabynyń bastyǵy, BQO TJD bastyǵynyń orynbasary, podpolkovnık A.Ahmetjanov tikeleı qadaǵalady. Ssenarıı boıynsha «qar kúrt erip, oǵan jaýyn-shashyn qosylyp, muzy áli tolyq ketpegen ózender tası jónelgen. О́ńirdegi iri sý qoımalaryn jaryp shyqqan tasqyn sý jolyndaǵyny qıratyp, transporttyq kommýnıkasııalar búlindi. Keıbir eldimekender otynsyz, azyq-túliksiz, medıkament pen eń kerekti zattarsyz qaldy. Adamdardyń ómiri men densaýlyǵyna qaýip tóndi».
Árıne, jamanattyń beti aýlaq. Biraq «Saqtansań, saqtaımyn» degen ǵoı. Oblys boıynsha barlyǵy 2140 adam jáne 676 birlik tehnıka qatysqan oqý-jattyǵý sharasy uıymshyldyqpen ótti. «Dýbrava» kempıngi aýmaǵyndaǵy Shaǵan ózenine «batyp ketken» jeńil kólik salonyndaǵy jolaýshylar, sý qoımasyna balyq aýlaýǵa baryp, «qıyn jaǵdaıǵa ushyraǵan» balyqshy der kezinde qutqaryldy.
Barlyq arnaıy qyzmet ókilderi úılesimdi qımyldap, tótenshe jaǵdaıdyń betin qaıtardy. Zardap shekkenderge alǵashqy medısınalyq jáne psıhologııalyq kómek kórsetildi.
- «Kóktem-2019» respýblıkalyq komandalyq-shtabtyq oqý-jattyǵýynyń eki kúndik qorytyndysy boıynsha barlyq alǵa qoıylǵan mindet oryndaldy, oqý-jattyǵý óz maqsatyna jetti, - deıdi BQO TJD baspasóz qyzmetiniń ókili Jádiger Qusaıynov.
Qazbek QUTTYMURATULY,
«Egemen Qazaqstan»
Batys Qazaqstan