Beısenbi, 17 mamyr 2012 8:16
Fransııanyń jańa prezıdenti Fransýa Olland GFR kansleri Angela Merkelmen Berlınde ótken kezdesýinde óz eliniń Germanııamen qarym-qatynasty nyǵaıta beretinin málimdedi.
Birlesken baspasóz máslıhatynda Fransýa Olland eki el arasyndaǵy baılanystar teńdestirilgen jáne qurmetke negizdelgen bolýy tıis dep atap kórsetken. Sondaı-aq kezdesýde Eýroodaqtaǵy qaryzdyq daǵdarys jaıy da talqylanǵan. Bul oraıda F.Olland A.Merkel usynyp otyrǵan birqatar qatań únemdeý sharalaryna óziniń qarsy ekendigin de bildirgen.
Beısenbi, 17 mamyr 2012 8:16
Fransııanyń jańa prezıdenti Fransýa Olland GFR kansleri Angela Merkelmen Berlınde ótken kezdesýinde óz eliniń Germanııamen qarym-qatynasty nyǵaıta beretinin málimdedi.
Birlesken baspasóz máslıhatynda Fransýa Olland eki el arasyndaǵy baılanystar teńdestirilgen jáne qurmetke negizdelgen bolýy tıis dep atap kórsetken. Sondaı-aq kezdesýde Eýroodaqtaǵy qaryzdyq daǵdarys jaıy da talqylanǵan. Bul oraıda F.Olland A.Merkel usynyp otyrǵan birqatar qatań únemdeý sharalaryna óziniń qarsy ekendigin de bildirgen.
Ulttyq birlik blogynyń jeńisi
Sırııada ótken saılaýda jeńiske jetken Ulttyq birlik blogy parlamenttegi 250 orynnyń 185-ine ıe boldy.
Bloktyń barlyq kandıdattary Arab sosıalıstik órleý partııasy (ASО́P nemese Baas) jáne onyń Progressıvti ulttyq maıdan boıynsha odaqtastary atynan usynylǵan bolatyn. Daýys berý nátıjeleri boıynsha 49 orynǵa ıe bolǵan táýelsiz depýtattar toby úshinshi oryn alǵan kórinedi. Saılaýǵa qatysqan birden-bir oppozısııalyq fraksııa – Beıbit ózgerister jolyndaǵy kúshter koalısııasy 5 depýtattyq mandatqa qol jetkizgen.
Jalaqordyń jazalanýyn talap etýde
Bir jyl buryn áıel zorlady degen daýǵa ilikken HVQ-nyń eks-basshysy Domınık Stross-Kan ózine kiná taqqan qonaqúı qyzmetshisiniń ústinen 1 mıllıon dollarǵa talap-aryz túsirdi.
Fransýz sosıalıstik partııasynyń burynǵy basshysy jáne Fransııa prezıdenttigine kandıdat Stross-Kan 32 jastaǵy gvıneıalyq Nafıssatý Dıallony ózine qasaqana kiná taqty dep aıyptap otyr. Sol arqyly ol munyń bedeline jáne kásibı josparlaryna asa úlken nuqsan keltirgen. Sonymen birge, Stross-Kan talap-aryzynda óziniń sot qýdalaýyna túskenin, zańsyz bas bostandyǵynan aıyrylǵanyn, sonyń báriniń kóńil-kúıine teris áser etkenin atap kórsetken.
Shyǵarylǵan úkim júzege asyryldy
Iranda ıadroshy-fızık Mostafa Ahmadı Roshannyń qaza tabýyna baılanysty ólim jazasyna kesilgen Majıd Djamalı Fashıge qatysty úkim júzege asty.
Sonymen birge, oǵan Izraıldiń paıdasyna shpıondyq jasap, sol úshin 120 myń dollar aldy degen de aıyp taǵylǵan bolatyn. Izraıl ókimeti bolsa, ózderiniń ol ólimge qatysynyń joq ekenin málimdep otyr. Aıta ketý kerek, ıadroshy-fızık M.Roshan onyń mashınasynyń astyna belgisiz bireýler ornatqan bombanyń jarylýynan qaza tapqan bolatyn.
Alıansqa narazylyq kúsheıýde
Beıbitshilik pen ádildik úshin kúresýshi 39 amerıkalyq uıym «NATO-syz bolashaq úshin jeli» dep atalatyn qurylym qurdy.
Olar Chıkagoda ótetin NATO sammıti qarsańynda «Beıbitshilik pen ekonomıkalyq ádilettilik jolyndaǵy kontrsammıt» dep atalatyn shara ótkizbekshi. Qurylym múshelerin Obamanyń Karzaımen jasaǵan kelisiminiń jobasy alańdatatyn kórinedi. Ásirese, 2014 jyly AQSh áskeriniń Aýǵanstannan tolyq shyǵarylatynyna kúmán úlken. Oǵan atalǵan kelisimniń Kongresti aınalyp ótip jasalmaqtyǵy sebepker bolyp otyr.
Eýroodaq ókiliniń mashınasy órteldi
Germanııada belgisiz bireýler Eýroodaqtyń Grekııa jónindegi jumys tobynyń basshysy Horst Reıhenbahtyń avtomobılin órtep jibergen.
Sonymen qatar, olar Reıhenbahtyń úıine boıaý toltyrylǵan paket te laqtyrǵan kórinedi. Eger eske sala ketsek, Reıhenbah pen onyń jumys toby Grekııaǵa el ekonomıkasy salasynda qurylymdyq reformalar júrgizýge kómek kórsetýmen aınalysýda. Deı tursaq ta, Grekııanyń ózinde qatań bıýdjettik únemdeý sharalarynyń qalyń jurtshylyq arasynda úlken qarsylyqqa tap bolyp otyrǵanyn da aıta ketý qajet.
Kezdesý pishini ózgeretin boldy
Reseı prezıdenti V.Pýtınniń Kemp-Devıdte ótetin «úlken segizdik» kezdesýine barýdan bas tartýyna baılanysty Aq úı AQSh prezıdenti B.Obama men Reseı premer-mınıstri D.Medvedevtiń kezdesýine ózgerister engizetin boldy.
Buǵan deıin sammıt sheńberinde eki el basshylary arasynda tolyqqandy kelissózder uıymdastyrý josparlanǵan eken. Onda Eýropadaǵy amerıkalyq zymyranǵa qarsy qorǵanys júıesi elementterin ornalastyrý jáne ekonomıkalyq qyzmettestik máselelerin talqylaý da qarastyrylǵan kórinedi. Endi osy kezdesýlerdiń bári ótpeıtin bolyp otyr.
Ratko Mladıch isi qaralýda
Gaagada Serb Respýblıkasy qarýly kúshteri bas shtabynyń burynǵy bastyǵy Ratko Mladıchtiń ústinen sot prosesi bastaldy.
Generalǵa on bir túrli aıyp, onyń ishinde, azamat soǵysy jyldarynda musylmandar men horvattardy qyrǵynǵa ushyratty jáne áskerı qylmystar jasady degen aıyp taǵylyp otyr. Atap aıtqanda, oǵan 1995 jyly Srebrenısede 8 myń adamdy óltirýge qatysy bar degen aıyp taǵylýda. Osy oraıda, burynǵy Iýgoslavııa aýmaǵyndaǵy azamattyq soǵys saldarynan júz myń adamnyń qurban bolǵanyn aıta ketý kerek.
Internet materıaldary negizinde ázirlendi.