Jasóspirimderdiń mektepten tys ýaqytyn tıimdi paıdalanýdy uıymdastyrý qylmystyń aldyn alýdaǵy izgi sharalardyń biri. Osy oraıda quqyq buzýshylyqtyń aldyn alý maqsatynda Almaty qalasy Naýryzbaı aýdanynyń jasóspirimder polısııasy «Hard way» trenajerlyq zalynyń qoldaýymen áleýmettik qoldaýǵa zárý otbasylardyń balalary úshin úsh aı boıy trenajer zalynda sportpen tegin aınalysýǵa múmkindik jasady.
Almaty qalasy Ishki ister departamenti Jergilikti polısııa qyzmetine qarasty ıývenaldyq polısııa bóliminiń bastyǵy, polısııa polkovnıgi Leıla Alıpbaevanyń aıtýynsha, jasóspirimderdiń bos ýaqytin tıimdi paıdalanýyn uıymdastyrý jalpyqoǵamdyq mindet. Naýryzbaı aýdanynda qolǵa alynǵan jasóspirimderdiń mektepten tys ýaqytta sportpen shuǵyldanýy salaýatty ómir saltyn ustanýyna múmkindik beredi.
Búginde sport klýbtary men seksııalaryna barlyq balalardyń kelýine múmkindik joq. Sondyqtan da jergilikti ákimdikter tarapynan da qala aýdandarynda ornalasqan sport keshenderine balalardyń tegin qatysýyn uıymdastyrý sharalary kóptep uıymdastyrylsa ıgi.
Elvıra Serikqyzy,
«Egemen Qazaqstan»
ALMATY