Almatylyqtar men qala qonaqtary úshin kóńilderdi shýaqqa bóleıtin ásem mýzyka keshin tamashalaýdyń taptyrmas múmkindigi týyp otyr. Á. Qasteev atyndaǵy Memlekettik óner mýzeıinde «Sálem, Kóktem!» atty mýzykalyq vernısaj ótedi. Respýblıkalyq jáne halyqaralyq konkýrstardyń laýreaty Talǵat Polatov (akkordeon) Pıassolla, Galıano, Brams, Qurmanǵazynyń jáne fransýz, brazılııa, ıspan kompozıtorlarynyń áıgili shyǵarmalaryn oryndaıdy.
Talǵat Polatov Qurmanǵazy atyndaǵy Qazaq Ulttyq konservatorııasyn professor A.M. Gaısınniń klasy boıynsha bitirgen. Respýblıkalyq jáne halyqaralyq konkýrstardyń laýreaty. Kóp jyldar boıy Qurmanǵazy atyndaǵy Memlekettik akademııalyq qazaq halyq aspaptary orkestrinde «Syrnaı» tobynyń konsertmeıstri bolyp eńbek etti. Osy orkestr quramynda Qazaqstan, Reseı, AQSh, Fransııa, Germanııa, Qytaı jáne t.b. elderdiń qalalaryndaǵy Kennedy Center (Vashıngton, SShA), «Karnegı holl» (Nıý-Iork, SShA), «Konserthaýs» ( Vena, Avstrııa), «Staats Oper unter den Linden» (Berlın, Germanııa) syndy álemge áıgili basqa da kóptegen konsert zaldarynda gastroldik týrlarda konsert qoıǵan daryn ıesi. Osy ujymdaǵy kóp jyldyq jáne jemisti eńbegi úshin QR Prezıdentiniń Qurmet gramotasymen marapattalǵan.
Akkordeon – kóptegen elderde halyq aspaby bolyp esepteledi. Ony Germanııa, Fransııa, Serbııa jáne Balqan túbegi elderinde tól aspabymyz dep qaraıdy. Al Reseılikter bul aspapty jaqsy kóretini sonsha, oǵan aty ańyzǵa aınalǵan orystyń Baıan jyrshysynyń atyn bergen. Muhıttyń arǵy betindegi AQSh-ta da akkordeon keńinen taraǵan. Jáne bul elde tutastaı tek akkordeonǵa ǵana arnalǵan birneshe mýzeı bar. Argentınada akkordeonmen uqsastyǵy kóp bandeon aspabynsyz birde-bir halyqtyq konsert ótpeıdi, Latyn Amerıkasynda paıda bolyp, álemdik qurmetke ıe bolǵan tango janry osynaý nazdy da jyly ári qońyr áýezdi tembrmen baılanystyrylady.
«Á. Qasteev atyndaǵy mýzeıdegi konsertte akkordeon jańasha, tosyn áýezde ún qatady – eliktirip, elitip, sezim tolqynyn týdyrady. Baǵdarlama repertýary keń – Fransııa men Latyn Amerıkasynyń áıgili áýenderi de, Ispanııanyń djaz standarttary men qyzba áýenderi de, Pıassollanyń tereń oıly shyǵarmalarymen birge onyń tango stılindegi shyǵarmalary da oryndalady. Ásem kesh 2019 jyldyń 4 sáýir kúni 19.00-de ótedi», – deıdi mýzeıdiń baspasóz qyzmetiniń jetekshisi Klara Isabaeva.
Arman OKTIаBR,
«Egemen Qazaqstan»
ALMATY