Keńse jumysy, negizinen, óńdeýshi ónerkásip jobalaryn qarjylandyrýǵa baǵyttalǵan. Aqtóbe oblysy «Atameken» Kásipkerler palatasynda jumys isteı bastaıtyn keńse quramyna oblys ákimdigi men «Damý» qorynyń ókilderi kirdi. Jobalyq keńse qyzmetiniń negizigi máseleleri jóninde BAQ-qa arnalǵan brıfıngte «Atameken» óńirlik kásipkerler palatasynyń dırektory Anar Darjanova men «Damý» qorynyń AF dırektory Berik Nurǵalıev aıtyp berdi.
Keńse jumysy bıznes-qoǵamdastyqty qarapaıym zattardyń ekonomıkasyn damytýǵa shaqyrady, jeńildetilgen nesıe berý baǵdarlamasyna qatysý sharttaryn túsindiredi jáne kásipkerlerdiń óz jobalaryn júzege asyrý barysynda kezdesetin máselelerdi sheshýge, kásipkerlerdiń ınvestısııalyq belsendiligin yntalandyrýǵa yqpal etetin bolady.
Aldaǵy ýaqytta bul qurylym jobalarǵa bıznes-jospar jasalǵan ýaqyttan bastap, qarjylandyrý kezeńine deıin qoldaý kórsetip qana qoımaı,onyń iske asyrylýyn qadaǵalap otyrady jáne qajetti kómek kórsetedi .
Eske sala keteıik, Memleket basshysynyń tapsyrmasymen Qazaqstan úkimeti qarapaıym zattar ekonomıkasynyń damýyna 600 mlrd teńge bólgen edi.
Osy somanyń 400 mıllıard teńgesi óńdeý ónerkásibiniń jáne qyzmet kórsetý salasynyń damýyna jumsalatyn bolady. Baǵdarlamada qaryz alýshylardy 15% -dan aspaıtyn mólsherde nesıelendirý mehanızmi qarastyrylǵan, onyń 8% jeke kásipkerlik sýbektileriniń ózderi tóleıdi. Qalǵan soma «BJK-2020» jáne agroónerkásiptik salany sýbsıdııalaý baǵdarlamasy aıasynda jeti jyldyq merzimmen memlekettik sýbsıdııa arqyly óteledi.
Jeńildetilgen nesıeler, negizinen, óńdeý ónerkásibindegi jobalarǵa, atap aıtqanda, jeńil ónerkásip salasyna, sondaı-aq, jıhaz, qurylys materıaldary men agroónerkásip ónimderin óndirýge beriledi.
«Baǵdarlama boıynsha daıyn ónimdi óndirýge, sondaı-aq, qajetti shıkizat pen bastapqy óńdeý ónimderin alý jáne ári qaraı ónimderdi satý boıynsha da qoldaý kórsetiledi. Jobalarǵa bıznes jospar qurylǵannan bastap, ony tolyq júzege asyrǵanǵa deıin kómek kórsetetin bolamyz»,-deıdi Aqtóbe oblysy kásipkerler palatasynyń dırektory Anar Darjanova.
Baǵdarlama aıasynda óndiristik sıkldyń barlyq kezeńderin damytýǵa erekshe nazar aýdarylady. Sondaı-aq mamandar jergilikti atqarýshy organdarmen birlesip, qujattama, kepildikter berý, satý naryǵyn izdestirý salasyndaǵy máselelerdi sheshý úshin kásiporyndarǵa dıagnostıka jasaıdy.
Mundaı keshendi ádis jańa óndiristerdi qurýmen qatar, qoldanystaǵy kásiporyndardyń qosymsha jumyspen qamtylyp, jańǵyrýyna múmkindik beredi.
Jalpy, elimizde atalǵan baǵdarlamany iske asyrý 2025 jylǵa qaraı 365 taýar túri boıynsha óndiristi 2,4 esege ulǵaıtyp, ımport úlesin 37% -ǵa deıin azaıtýǵa múmkindik beredi dep kútilýde.Búgingi kúni atalǵan baǵdarlamaǵa 9 ekinshi deńgeıli bank qosyldy.
«Kásipkerler palatasy bıznesti belsendilik tanytýǵa shaqyrady, óıtkeni aımaqqa beriletin soma usynylǵan jobalar sanyna qaraı bólinedi. Qarjy alǵysy keletin kásipkerler Aqtóbe oblysynyń Jobalyq keńsesine jolyǵyp, jobalaryn júzege asyrýyna tolyq qoldaý ala alady. Búgingi kúni oblys boıynsha 24 qatysýshy tilek bildirdi», - deıdi О́ńirlik palata basshysy Anar Darjanova.
Jobalyq keńseniń otyrysy apta saıyn ótkiziletin bolady. «Qarapaıym zattar ekonomıkasyn» damytý aıasynda jeńildetilgen nesıe berý baǵdarlamasy arnaıy tizim boıynsha, kestege saı júrgiziledi. Jobalyq keńseniń respýblıkalyq jáne jergilikti bólimderiniń otyrysy bıznes qaýymdastyqtyń jáne baǵdarlamaǵa qatysýshylardyń qatysýymen ótetinin habarlady Aqtóbe oblysynyń «Atameken» kásipkerler palatasy.
Jobalyq keńseniń meken-jaıy: Aqtóbe q., Sáńkibaı batyr d-ly, 22K, «Qazyna» bıznes ortalyǵy. Aqparattyq telefondar: 8 (7132) 744-611 (ishki 1509), 744-612 (ishki 1526). Elektrondyq poshta: d.borankulov@atameken.kz .
Al nesıeleý mehanızmi men sharttary týraly Aqtóbe oblysy Kásipkerler palatasynyń saıtyndaǵy «Qarapaıym zattardyń ekonomıkasy» bóliminen bilýge bolady.
Temir QUSAIYN,
«Egemen Qazaqstan»