Prezıdent laýazymyna kirisýimen quttyqtady

Shveısarııa Konfederasııa­synyń Prezıdenti Ýlı Maýrer óziniń quttyqtaý jedelhatynda Shveısarııanyń Qazaqstanmen yntymaqtastyqty, sondaı-aq Halyqaralyq valıýta qory men Dúnıejúzilik bank aıasyndaǵy ózara tıimdi yqpaldastyqty odan ári nyǵaıtýǵa nıetti ekenin atap ótken.

Oman Sultany Kabýs ben Saıd Qasym-Jomart Toqaevqa óziniń jyly lebizin bildirip, Omannyń Qazaqstanmen jan-jaqty seriktestikti odan ári nyǵaıtýǵa jáne dostyq baılanys­tardy damytýǵa múddeli ekenin jetkizgen.

Oman Sultandyǵy Mı­nıstr­ler Keńsesi Premer-Mınıstriniń orynbasary Oman Fahd Ál-Saıd ta óz quttyqtaý hatyn joldady. Ol Qazaqstan halqynyń tabysqa kenelip, ósip-órkendeı berýine tilektestigin jetkizgen, sondaı-aq eki el arasyndaǵy qarym-qatynastardy odan ári nyǵaıtýǵa senim bildirgen.

Ázerbaıjan Respýblıkasynyń Prezıdenti Ilham Álıev Qasym-Jomart Toqaevty Prezıdent laýa­zy­myna kirisýimen quttyq­tap, eki eldi dostyq pen yntymaq­tastyqtyń kópǵasyrlyq baılanystary jalǵap jatqanyn atap ótken. Ázerbaıjan kóshbasshysy memleketaralyq qatynastardy odan ári damytýǵa jáne keńeıtýge senim bildirdi.

Polsha Respýblıkasynyń Pre­zı­denti Andjeı Dýda óz qut­tyq­taý hatynda elderimiz ara­syn­daǵy jaqyndyq pen jemisti yntymaqtastyqty atap ótken, sondaı-aq ekijaqty baılanys­tardy tolyqqandy damytýǵa senim bildire otyryp, Qazaqstan halqyna baq-bereke tilegen.

Reseı Federasııasy Úkimetiniń tóraǵasy Dmıtrıı Medvedev Qasym-Jomart Toqaevtyń Mem­leket basshysy laýazymy qyz­metindegi aýqymdy mindetterdi tabysty sheshetin mol tájirıbesi bar ekenin atap ótken.

«Qazaqstan men Reseıdiń dos­tyq, seriktestik jáne odaqtas­tyq qarym-qatynastaryn odan ári tereńdetý, sondaı-aq saýda-ekonomıkalyq, ǵylymı-tehnı­kalyq, gýmanıtarlyq jáne basqa da salalardaǵy yntymaq­tastyqty nyǵaıtý maqsatymen úkimetter arasyndaǵy birlesken jumysty jandandyrýǵa daıyn ekendigi­miz­di jetkizgim keledi», delingen jedelhatta.

BUU-nyń turaqty úılestirý­shisi Norımasa Shımomýra óz jedelhatynda Qazaqstan halqyna tabys pen baq-bereke tilep, BUU ornyqty damý maqsattaryn ilgeri­letip kele jatqan Qazaq­standy órkendetý isine jan-jaqty qoldaý kórsetetinin atap ótken.

IýNKTAD-nyń Bas hatshysy Mýhısa Kıtýıı óziniń quttyq­taý hatynda Qasym-Jomart Toqaevtyń Prezıdent laýazy­myndaǵy qyzmetine tabys tilep, ózara tıimdi yntymaqtastyq­ty jal­ǵas­tyrýǵa daıyn ekenin jetkizgen.

Eýropadaǵy qaýipsizdik jáne yntymaqtastyq uıymy Par­lamenttik Assambleıasynyń Prezı­denti Georgıı Seretelı jáne osy uıymnyń Parlamenttik Assam­­bleıasynyń Bas hatshysy Roberto Montella da óz qut­tyqtaýlaryn joldap, Qazaq­stanmen aradaǵy qarym-qatynastardy odan ári ny­ǵaıtyp, damytýǵa nıetti eken­dikterin jetkizgen.