Qazaqstan men Reseı arasyndaǵy XV aımaqaralyq yntymaqtastyq forým aıasynda Qaraǵandy jáne reseılik týroperatorlar yntymaqtastyq týraly kelisimshart jasasty. Bul qujat boıynsha bıyldan bastap Reseıdiń Túmen oblysynyń týrısteri Balqash kóline kelip demalatyn bolady. Olar úshin ázirlengen týr baǵdarlamasynda Qazaqstan astanasy Nur-Sultan qalasynyń kórikti jerlerine ekskýrsııa jasaý jáne Balqash kóline transfer qarastyrylǵan. Baǵdarlama úılestirýshileri reseılikterdi jańa týrıstik marshrýtta kózdelgen jaımashýaq kún men jaıly jaǵajaı ǵana emes, sonymen qatar tartymdy baǵalar da qyzyqtyrady degen senimde. Túmendikter túsetin negizgi nysan retinde Shubartúbek jáne Torańǵylyq demalys aımaqtary belgilengen.
Sondaı-aq, atalǵan forýmda týrızmdi damytýdaǵy jańa tásilder men úrdisterdi de talqylandy.
Búgingi kúnde týrızmdi damytý memlekettik baǵdarlamasy boıynsha Balqash kóli mańynda jańa nysandar salý, jaǵajaılardy abattandyrý, kommýnıkasııalardy júrgizý syndy keshendi jumystar qolǵa alynǵan. Bıyl uzyndyǵy 360 shaqyrymdy quraıtyn tórt jolaqty «Qaraǵandy-Balqash» avtobanynyń qurylysyn bastaý da josparda bar.
Qaırat ÁBILDA,
«Egemen Qazaqstan»
Qaraǵandy oblysy