Energetıka mınıstriniń buıryǵymen Serik Júsipuly Súleımenov Atomdyq jáne energetıkalyq qadaǵalaý men baqylaý komıtetiniń tóraǵasy qyzmetine taǵaıyndaldy. Bul týraly Premer-Mınıstrdiń baspasóz qyzmeti habarlady.
S. Súleımenov 1966 jyly Almaty qalasynda dúnıege kelgen. S. M. Kırov atyndaǵy Qazaq memlekettik ýnıversıtetin, Ál-Farabı atyndaǵy Qazaq memlekettik ýnıversıtetin támamdaǵan.
Eńbek jolyn 1990 jyly Almaty qalasynda QazKSR Ǵylym akademııasy janyndaǵy Matematıka jáne mehanıka ınstıtýtynyń aspıranty retinde bastaǵan. Ártúrli jyldary kommersııalyq sektorda jumys istegen, Prezıdent Ákimshiliginde jáne Premer-Mınıstrdiń Keńsesinde jumys tájirıbesi bar.
2013–2015 jyldary «Qyzylorda elektr taratýshy jelilik kompanııasy» AQ basqarma tóraǵasy, dırektorlar keńesiniń tóraǵasy laýazymdaryn atqarǵan. 2015 jylǵy qazannan bastap qazirgi tańǵa deıin Qyzylorda oblysynyń ákiminiń orynbasary qyzmetin atqarǵan.