Búgin Májilistiń jalpy otyrysynda depýtat Aına Mýsralımova qaqtyǵys saldarynan zardap shegip jatqan Irandaǵy balalalardyń taǵdyryna alańdaýshylyq bildirip, oǵan qatysýshy taraptardy parasattylyq tanytyp, balalar men analardyń amandyǵy úshin beıbit kelissózderdi múmkindiginshe tezirek bastaýǵa shaqyrdy, dep jazady Egemen.kz.
28 aqpan kúni Irannyń Mınab qalasynda mektepke jasalǵan soqqy saldarynan 150-den astam oqýshy qyz qaza tapty. 95 adam jaraqat aldy. Aına Mýsralımova qazaq halqy jantúrshigerlik oqıǵany tereń kúızelispen qabyldaǵanyn jetkizdi.
«Bul jaı ǵana statıstıka emes. Sandardyń artynda úzilgen ómir, otbasylardyń kúıregen taǵdyrlary, oryndalmaǵan arman-úmitter tur. Júzdegen otbasy bir sátte súıikti qyzdarynan, ápke-qaryndastarynan, nemerelerinen aıyryldy. Qara polıetılen qaptarǵa salynǵan kishkentaı deneler týraly beınejazbalar búkil álemge tarady. Qaza tapqan balalardyń týystary tragedııa ornynan olardyń sómkeleri men kitaptaryn, jeke zattaryn jınap jatqan sátterdi kóz jassyz ári mundaı qaıǵyǵa jol bergen eresekter úshin uıat seziminsiz kórý múmkin emes», dedi depýtat.
Ol balalardyń qaqtyǵys kezinde qaza tabýy halyqaralyq quqyqtyń irgeli qaǵıdattarynyń saqtalmaýyn ańǵartatynyn tilge tıek etip, Qazaqstan árdaıym kez kelgen halyqaralyq qaqtyǵysty beıbit jolmen retteýdi qoldaıtynyn atap ótti.
«Tegeran endi burynǵydaı bolmaıdy»: Izraıl men AQSh Iranǵa soqqy jasady
«Qazaqstan árqashan beıbitshilik, kelisim jáne baqytty balalyq shaq qaǵıdattaryn ilgeriletedi. Biz zardap shekken otbasylarǵa qaıǵyra kóńil aıtyp, barlyq máseleniń tezirek sheshilýine úmit bildiremiz. Qaıǵyǵa qatysty qoldaý sózderin Oqý-aǵartý mınıstri Juldyz Súleımenova jáne Qazaqstandaǵy Bala quqyqtary jónindegi ýákil Dınara Zákıeva bildirdi. Áriptesterim bul qasiretti jaǵdaıǵa qatty kúızelip, qaqtyǵys taraptaryn kelissózderge jáne beıbitshilikti qalpyna keltirýge shaqyrdy. Qazaqstandy Iran, Izraıl jáne AQSh elderimen uzaq jylǵy áriptestik tarıhy baılanystyrady. Qaqtyǵysqa qatysýshy taraptardy parasattylyq tanytyp, balalar men analardyń, olardyń ómiriniń amandyǵy úshin beıbit kelissózderdi múmkindiginshe tezirek bastaýǵa shaqyramyz», dedi Aına Mýsralımova.