Bıyl aqpan aıynda oblys ákimdiginiń qaýlysyna sáıkes jedel medısınalyq kómektiń aýdandyq bólimshelerin ońtaılandyrý isi júzege asqan bolatyn. Aqtóbe oblystyq densaýlyq saqtaý basqarmasynyń basshysy Áset Qalıevtiń aıtýynsha, bul usaq qurylymdar «Alǵashqy kómek» JShS quramyna qosylǵan. Sonymen birge Jol kartasynda qarastyrylǵan sharalar keshenine sáıkes qala emhanalarynyń janynan shuǵyl medısınalyq kómek berý qosyndary qurylǵan. Onyń bári de táýlik boıy jumys isteıdi. Qosyndardyń qyzmeti jedeldiktiń tórtinshi dárejesine sáıkes keledi.
Osy oraıda jedeldiktiń tórtinshi dárejesi degen tirkeske túsinikteme bere ketken jón. Jedel járdem mamandarynyń málimdeýinshe, shuǵyl medısınalyq kómek kórsetý jedeldiktiń tórt dárejesimen tańbalanady. Mysaly, ınsýlttiń aýyr túrleri, júrek talmasy, aýyr jaraqat alý kezindegi shaqyrýlar birinshi dáreje qataryna kiredi eken. Mundaı jaǵdaıda jedel járdemniń kelý ýaqyty barynsha tez bolatyny aıtpasa da túsinikti.
Búginde óńir turǵyndaryna 67 jedel medısınalyq járdem brıgadalary kómek kórsetedi. Sonyń ishinde oblys ortalyǵynda 52 dárigerlik-feldsherlik brıgadalar táýlik boıy jumys isteıdi. Turǵyndardy atalǵan kómekpen qamtý sany men kólemi jyl basynda oblys boıynsha 870 myńǵa jýyq adamdy qurady. Atalǵan kórsetkish Aqtóbe qalasy boıynsha 510 myń adamnan asyp túsedi. Al brıgadalar men avtokólikterdiń sanyna kelsek, bul mólsher aldyn ala belgilengen talaptar men normatıvterge sáıkes keledi.
Mundaǵy basty ólshem ár 10 myń turǵynǵa shaqqanda 1 sanıtarlyq avtokólik brıgadasy qyzmet kórsetýge eseptelgen. Jedel járdem brıgadalarynyń qyzmet kórsetý radıýsy Aqtóbe qalasynda 35 shaqyrymdy quraıdy. Mundaǵy mólsherli ýaqyt shegi, ıaǵnı shaqyrylǵan syrqatqa jedel járdem avtokóliginiń jetý ýaqyty 15 mınýttan aspaıdy. Byltyrǵy kórsetkishterge sáıkes medısınalyq kómek kórsetý qyzmetkerleri bir jyl ishinde 300 myńǵa jýyq shaqyrýdy qamtyǵan. Onyń basym bóligi Aqtóbe qalasy turǵyndarynyń úlesine tıedi. Aıtalyq, ótken jyly qala boıynsha naýqasqa kelý kórsetkishi 5,7 mınýtty kórsetti. Budan keıingi dárejeler boıynsha 9,2-11,3 jáne 15,9 mınýtta jedel járdemniń jetýi tirkelgen.
Árıne ómir bolǵan soń, jedel shaqyrýlarǵa keshigip barý kórinisteri kezdespeı turmaıdy. Turǵyndardyń ókpe-renishteri kóbine osyndaı jaǵdaıda týyndaıtyny belgili. Degenmen, bıyl mundaı kórsetkishterdiń azaıǵany aıqyn kórinedi. Sonymen birge jedel medısınalyq kómek berý qurylymdarynyń materıaldyq-tehnıkalyq bazasy jyl saıyn jaqsaryp keledi. Shaqyrýlar boıynsha jolǵa shyqqan dárigerlik-feldsherlik brıgadalardyń is-qımyldaryn baqylaý tetikteri de tereńdeı túsýde. Sondaı-aq oblysta dárigerlik-feldsherlik jáne júrgizýshilik quramdardyń biliktiligin kóterý isi júıeli jolǵa qoıylǵan.
Temir QUSAIYN,
«Egemen Qazaqstan»
AQTО́BE