Bıyl mine birneshe kúnnen beri Besqaraǵaı aýdany turǵyndary tilsiz jaýmen kúresýde. 1 sáýirde aýdan ortalyǵy – Besqaraǵaı aýylynda 80-ge jýyq úıdiń aýlasyna sý kirgeni, tipti bir úıdiń qabyrǵasy qaqyrap, qulap qalǵany jaıynda aıtylǵan-dy.
Búgin oblystyq Tótenshe jaǵdaılar departamentiniń baspasóz qyzmeti Besqaraǵaı aýylynda 3 úı men 59 úıdiń aýlasy sý astynda qalyp otyrǵanyn, sý basqan baspanalardan 7 adam qaýipsiz jerge kóshirilgenin, aýdan ortalyǵyndaǵy kolledjde, orta mektep pen balabaqshada 250 adamdy qabyldaýǵa qaýqarly evakýasııalyq beketter ashylǵanyn habarlady. «Kýlıkovskoe kólinen sýdy burý úshin aýyl arasyndaǵy joldan uzyndyǵy 15 metr, tereńdigi 30 sm bolatyn or qazyldy.
Munda sý deńgeıi turaqtandy. Alaıda, endi aǵyn sý Qamysh kóline quıyp jatyr. Sýdy saǵatyna 500 tekshe metrge deıin sorýǵa qabiletti 2 sorǵysh motor-sorǵy ornatyldy. Jalpy alǵanda 156 myń tekshe metrden astam sý soryldy.
Jergilikti atqarýshy organdardan tıegish, KamAZ jáne ekskavatorlar jumyldyryldy», - deıdi oblystyq Tótenshe jaǵdaılar departamenti bastyǵynyń orynbasary Aleksandr Lomygın.
Shyǵys Qazaqstan oblysy,
Besqaraǵaı aýdany