Olımpıadalyq sport túrleri boıynsha ulttyq qurama bapkerlerimen ótken kezdesýge Qazaqstan Ulttyq Olımpıadalyq komıtetiniń prezıdenti Tımýr Qulybaev pen Mádenıet jáne sport mınıstri Arystanbek Muhamedıuly jetekshilik etti.
Tórtjyldyq dodasynyń bastalýyna bir jyldan asa ýaqyt qaldy. Búgingi tańda sportshylardyń aldynda Tokıo oıyndaryna joldama alý mindeti tur. Jıyn barysynda boks, dzıýdo, semserlesý, taekvondo, kúres túrleri, nysana kózdeý, sý doby, velosport pen aýyr atletıkadan bas bapkerlerdiń esebi tyńdaldy. О́zge de olımpıadalyq sport túrlerindegi bas bapkerler komandamen birge jarysta júrgendikten, olardyń esebin mamyrdyń aıaǵyna deıin tyńdaý josparlanyp otyr.
«Tokıo-2020 Olımpıada oıyndaryna daıyndyqty talqylaý úshin búgingi jıyndy uıymdastyrǵan Ulttyq Olımpıadalyq komıtetke alǵys bildiremiz. Mınıstrlik, UOK jáne federasııalar birlese otyryp, qazaqstandyq sportshylardyń Olımpıadaǵa irikteý kezeńinen sátti ótýine jaǵdaı jasaýymyz qajet. Sondaı-aq, olardyń sapaly túrde daıyndalýyna kúsh salýymyz kerek», - dedi mınıstr.
Jıyn barysynda bapkerler barlyq komandalardyń qajetti materıaldyq-tehnıkalyq bazamen jabdyqtalǵanyn, kadr máselesi men medısınalyq jabdyqtaý turǵysyndaǵy qıyndyqtardyń sheshilgenin atap ótti. Qazaqstan UOK prezıdenti keshendi-ǵylymı toptardyń máselesine nazar aýdarýdy tapsyrdy.
«Eń aldymen sportshylardyń fýnksıonaldyq daıyndyǵy men farmakologııalyq turǵydan qamtamasyz etilýin retteıtin resýrstarymyz bolýy tıis. Sondaı-aq, sportshylardy eń basty jarystarǵa naǵyz babynda aparýǵa mindettimiz. Keshendi-ǵylymı top músheleri olarmen tyǵyz jumys isteýi kerek», - dedi T. Qulybaev.
Qazirgi tańda keshendi-ǵylymı top quramyndaǵy 110 maman (dáriger, massajshy, psıholog pen bıohımık) kún saıyn sportshylarmen birge oqý-jattyǵý jıyny men jarystarda qyzmet etýde.
Qazaqstan UOK basshysy «taza sport» erejelerin saqtaýdyń mańyzdylyǵyna taǵy da toqtalyp ótti.
«Dopıngke degen teris kózqarasymyzdy naqty ári senimdi túrde jarııalaýymyz kerek. Sol sebepti, árbir sportshy, árbir bapker men árbir keshendi-ǵylymı top qyzmetkeri bizdiń sportshylardy atalǵan problemadan saqtandyrý kerektigin túsinýi qajet. Bul turǵyda biz eń myqty ustanymnan bas tartpaımyz. Eger qandaı da bir ereje buzýshylyq baıqalyp, dáleldense, sportshylar men jattyqtyrýshylardy túrli tásildermen jazalaýǵa mindettimiz. Búginde Parlamentte sportshynyń jaýapkershiligin arttyra túsetin dopıngke qarsy zań jobasyn qaralyp jatyr. Osy oraıda depýtattardyń sportqa oń kózqaras tanytyp, mundaǵy problemalardy birlese sheshýge ún qosqanyna alǵys aıtqym keledi», - dedi UOK prezıdenti.
Sondaı-aq, ol otandyq sportta dopıngpen kúresý máselesi birinshi kezekte turatynyn eskertti.
«Bul máselege óte saq bolyp, únemi baqylaýda ustaý qajet. Árbir qurama men árbir sportshy úshin is-shara josparynyń naqty bolýyn usynamyn. Sportshylardyń mindeti bolýy tıis. Olardyń dopıng qabyldaýǵa quqyǵy joq», - dedi QR UOK prezıdenti Tımýr Qulybaev.
Aıta ketelik, Qazaqstan UOK dopıngke qarsy ortalyq jáne sporttyq federasııalarmen birlese otyryp, 2020 jylǵy Olımpıada oıyndarynyń qarsańyndaǵy dopıngke qarsy sharalar aıasynda árbir sportshymen jekelegen jumys júrgizýdi jalǵastyrady jáne jyl boıyna jarystan tys baqylaý ótkizedi. Bir jyl shamasynda Halyqaralyq Olımpıadalyq komıtettiń talaptaryna sáıkes jarys kezinde jáne jarystan tys ýaqytta 3000 synama alý josparlanýda.
Qazirgi tańda alda turǵan basty mindet – Olımpıada oıyndaryna joldama alý. Búginde qazaqstandyq jeńil atlet sporttyq júris boıynsha Olımpıada oıyndarynyń joldama beretin normatıvti oryndady.
2019 jyly ulttyq qurama komandalar 28 lısenzııalyq álem chempıonatyna, 19 Azııa chempıonatyna, sondaı-aq, Olımpıada oıyndaryna kvota beretin 12 álemdik irikteý týrnırine qatysýdy josparlaýda. 2020 jyly bizdiń komandalar 3 álem chempıonaty, 19 Azııa aımaqtyq, 18 álemdik irikteý týrnırlerine qatysady. Sondaı-aq, lısenzııa alý úshin reıtıngilik upaı beretin 50-den asa álem kýbogi kezeńderinde baq synaý mindeti tur. 2020 jyldyń 25 maýsymynda lısenzııalyq jarystar tizbegi tolyǵymen aıaqtalady.
«Mamyr aıynda Manchester qalasynda taekvondodan álem chempıonaty ótedi. Álemdik doda aldynda Ońtústik Koreıada ótetin oqý-jattyǵý jıyndaryna qatysamyz. Bizdiń aldymyzdaǵy eń mańyzdy doda – Tokıodaǵy Olımpıada oıyndary. Tórtjyldyq dodasyna qatysý úshin Búkilálemdik taekvondo federasııasy túzgen reıtıngte úzdik bestikke ený qajet. Ázirge bizde mundaı sportshylar joq. Dese de, álem chempıonatynan keıin ótetin Azııa aımaqtyq irikteý synynda olımpıada joldamasyn ıelenetin múmkindigimiz bar», - deıdi taekvondodan Qazaqstan ulttyq quramasynyń bas bapkeri Iý Iong Djın.
Sý dobynan erler komandasynyń bas bapkeri Aleksandr Shvedov Tokıo-2020 oıyndaryna joldama alý týraly josparlarymen bólisti.
«Sý dobynan Olımpıada oıyndaryna Azııa aımaǵyndaǵy irikteý týrnıri kelesi jyldyń aqpanynda bizdiń astanamyzda ótedi. Búginde komandamyz atalǵan synǵa daıyndyq ústinde. Barlyq qarsylastardy jeńýge bolady. Sol sebepti, Olımpıada oıyndaryna qatysatyn múmkindigimiz bar. Qazirgi tańda komanda Reseı chempıonatyndaǵy kezdesýlerin aıaqtap, Álemdik lıganyń sýperfınalyna daıyndyqty bastaıdy. Atalǵan týrnır arqyly álem birinshiligine daıyndyǵymyzdy pysyqtaımyz. Bári jospar boıynsha ótýde. Qazaqstan UOK bizdi barlyq qajetti quraldarmen, keshendi-ǵylymı top múshelerimen jabdyqtady», - deıdi sý dobynan Qazaqstan quramasynyń bas bapkeri Aleksandr Shvedov.
Eske sala keteıik, Tokıodaǵy Olımpıada oıyndary 2020 jyldyń 24 shildesi men 9 tamyzy aralyǵynda ótedi.