Álemniń jıyrmadan astam elinen úsh júzden asa kompanııalar at basyn tiregen kórme alańy halyqaralyq týrızm jetistikteriniń jańalyqtaryn jarııalap, alǵashqy áriptestik kelisimderge qol qoıyldy deýge negiz bar.
Búginde KITF ishki týrızm reıtınginde medısınalyq jáne iskerlik týrızmnen kósh ilgeri tur. «Myń boıaýly Almaty» óz qonaqtaryn bıyl erekshe kelbette qarsy alyp otyr. Marketıngtik zertteýler nátıjesine sáıkes osy 19 jylda uıymdastyrýshylar 350-den asa kelisim-sharttarǵa qol jetkizse, bıylǵy jylǵy kórme aıasynda myńnan astam kelisimder jasalady degen boljam bar.
Almaty qalasy Týrızm basqarmasynyń jetekshisi Maqsat Qıqymov ótken jyldyń qorytyndysy boıynsha týrıster sany bir mıllıonnan asyp, salystyrmaly kezeńmen alǵanda 12 paıyzǵa artqandyǵyn jetkizdi. Bul kórsetkishtiń tórt júz myńǵa jýyǵyn sheteldik týrıster quraıdy. Búginde týrızm kórsetkishteri medısınalyq, sporttyq, oqıǵalyq, mádenı-tanymdyq, iskerlik, taý týrızmi, t.b. túrleriniń damýyna táýeldi.
Elimizge keletin sheteldik týrısterdiń basym kópshiligin kóshpendiler tarıhy men myń jyldyq tarıhy bar Almaty qalasynyń qalyptasýy qyzyqtyrady. Osy maqsatta «Rýhanı jańǵyrý» baǵdarlamasy sheńberinde «Boraldaı saq qorǵandary» saq mádenıet ortalyǵynyń, «Saq qorǵany» jáne «Raıymbek batyr» murajaılarynyń, «Qazaqfılm» aýmaǵynda «Ethnoland» etno-mádenı kesheniniń qurylysy josparlanyp otyr. Boljam boıynsha, «Ethnoland» jáne Boraldaı saq qorǵandaryn orta eseppen jylyna mıllıonnan astam týrıst qyzyqtaıtyn bolady. Sonymen qatar mańyzdy salalardyń biri balalar týrızmin damytýǵa baılanysty ázirlengen oqytý baǵdarlamasyna oraı qala mektepterinde sáýir aıynyń ekinshi jartysynan bastap ár túrli taqyryptarda mektep saǵattary ótedi dep josparlanǵan.
Almatynyń týrızm basshysynyń aıtýynsha, ótken jyly Avstrııanyń «Master Concept» kompanııasymen birlesip Almaty aglomerasııasynyń taý klasterin damytý jospary ázirlengen. 2025 jylǵa deıin Alataý baýraıynda klasterlik taý shyńǵysy týrızmin damytý josparlanyp otyr. Shyǵys –Túrgen taýlary, Ortalyq – Almaty qalasy jáne Batys – Qaskeleń taýlary sııaqty úsh klaster boıynsha jasalatyn shańǵy jolynyń uzyndyǵy 456 shaqyrymdy quraıdy ári onyń boıynda ondaǵan demalys oryndary boı túzemek. Al «Oı qaraǵaı», «Alma taý» taý shyńǵysy kýrorttaryna deıin turaqty marshrýttar júrgiziledi. Sonymen qatar týrısterge arnalǵan aqparattyq ortalyqtardyń jumysy da turaqty jetildirilip otyrady.
KIFT jetekshisi Vıktorııa Pavlenkonyń aıtýynsha, KITF kórmesinde elimizdiń 16 aımaǵynyń basyn biriktiretin Ulttyq qazaqstandyq top Qazaqstan týraly erekshe portfolıo usynatyn bolady. Ázirbaıjan, Túrkııa, Mysyr, Úndistan, Grekııa, Grýzııa, Qytaı, Indonezııa, Indııa, AQSh, Izraıl, t.b. elderden kelgen mamandar jańa tehnologııalar men sıfrlandyrý, medısınalyq jáne sanatorııalyq-kýrorttyq týrızm boıynsha forýmdarda salaǵa qatysty úzdik tájirıbelerimen bólisetin bolady.
Qazaqstandyqtar úshin halyqaralyq kórmeler nesimen tartymdy? Osy suraqtyń jaýabyna qatysty málimetterden habardar etken Qazaqstan týrıstik qaýymdastyǵynyń dırektory Rashıda Shaıkenova kórme – adamdardyń qarym-qatynas alańy dep atap ótti. KITF aıasy jyldan-jylǵa keńeıip keledi. Rashıda Shaıkenovanyń aıtýynsha, búginde kórme aýqymyn arttyrýdyń zamanaýı marketıngtik jáne tehnologııalyq múmkindikteri jetkilikti. Týrızm salasynyń ókilderi úshin kórme alańdarynda ózderine senimdi áriptester tabý asa mańyzdy. Bıylǵy jyly KITF kórmesine sonaý Altaı óńirinen de delegattar keldi. Al mundaı áriptestiktiń irgetasy Petropavlda jasalǵan kelisimder negizinde qalanǵan-dy.
Qazaqstan 2001 jyldan bergi aralyqta iri halyqaralyq kórmelerdiń turaqty qatysýshysy bolyp keledi. Osy ýaqytta kóptegen tájirıbe jınaqtaǵan otandyq týrızm mamandary endigi kezekte óz ónimderin qandaı elderdiń kórmesine usynamyz degenge nazar aýdaryp otyr.
Búginde elimizde iskerlik týrızmnen góri ekotýrızmge Vengrııa, Polsha, Avstralııa jáne t.b. elderden kelgen týrısterdiń qyzyǵýshylyǵy arta túskendigine qatysty málimettermen bólisken Rashıda Shaıkenova týrısterdi kóptep tartý qyzmet sapasymen baılanysty dep atap ótti. Kimde-kim júıeli, turaqty, sapaly jumys istese, sol bıznestiń ómirsheń bolatyny anyq. Al sapa básekelestik ortada ǵana nyǵaıa túsedi. Búginde elimizge alpystan astam memlekettiń azamattary vızasyz saıahattaı alady. Aldaǵy ýaqytta bul kórsetkishtiń aıasy keńeıa beretini anyq. Týrızm salasyn damytýda strategııalyq máselelerdi josparlap, zańnamalyq júıeni retteýdiń mańyzy zor. Al otandyq týrızmniń damýy ekonomıkalyq ósimmen qatar, shaǵyn jáne orta bıznestiń qarqyndy damýyna yqpal etetini anyq.