Senbi, 2 maýsym 2012 7:39
Velosport jankúıerin dúrliktirgen Djıro velobáıgesi de márege jetti. 21 kezeńde 3500 shaqyrymdy velosıped ershigine otyryp baǵyndyrǵan 200-ge jýyq shabandoz elderine oraldy. Bıylǵy 95-shi «Djıro» Kanada sańlaǵy, «Garmin-Barracuda» ókili Raıder Heshedalǵa baǵyndy.
Senbi, 2 maýsym 2012 7:39
Velosport jankúıerin dúrliktirgen Djıro velobáıgesi de márege jetti. 21 kezeńde 3500 shaqyrymdy velosıped ershigine otyryp baǵyndyrǵan 200-ge jýyq shabandoz elderine oraldy. Bıylǵy 95-shi «Djıro» Kanada sańlaǵy, «Garmin-Barracuda» ókili Raıder Heshedalǵa baǵyndy.
«Astana» tergen jemiske kelsek, eki kezeńdik jarysta tuǵyrdan qol bulǵadyq. Jalpy eseptegi eń úzdik kórsetkish komanda kapıtany Roman Kroısıgerdiń enshisinde. Qazaqstandyqtar arasynda Andreı Zeıs 85 orynǵa jaıǵasty. Al sońǵy jekeleı synda Aleksandr Dıachenko kóshbasshy Marko Pınottıden (BMC Racing Team) 2 mınýt 13 sekýnd artta qalyp, 37-orynnan kórindi.
Úmitsiz shaıtan
Qazaqstandyq bir top jýrnalıst Italııaǵa «Djıro» kópkúndiginiń 18-kezeńi aıaqtalǵanda jettik. Biz kelgende, «Astana» komandasynyń tehnıkalyq qyzmetkerleri, biri shaıtanarbany jýyp, biri maılap álek eken. Shabandozdardyń ózi tynyǵýǵa bólmelerine attanypty. Komandanyń sport basshylary bas qosqan jınalystan jańa shyqqan Dmıtrıı Sedýndy sózge tarttyq. Bilgimiz kelgeni – tym jaqsy kele jatqan komandany aıaqtan shalǵan ne qyrsyq?
«On jetinshi kezeńde Romannyń aıaq tamyrlary tartylyp, márege zorǵa jetti. О́z basym Romandy mundaı kúıde kórgenim joq. Sonyń saldarynan 11 mınót artta qalyp, jalpy esepte jıyrmasynshy orynnan bir-aq shyqty. Múmkin, «Djıroǵa» daıyndyq barysynda eskerilmegen, kóńil bólinbegen tustar bolǵan shyǵar. Biraq, ol áli jas. Úlken jeńisteri alda dep senińizder. Al komanda taktıkany ózgertti. Sońǵy eki taýly kezeńde jeńiske jetýge barymyzdy salyp jatyrmyz», dep aǵynan jaryldy Astana bapkeri.
«Djırony» baǵyndyrý
Veloshabandozdar sóreden shyǵyp, jarys jolyna shyqqan soń, biz avtokólikke otyryp, teńiz deńgeıinen 2757 metrde ornalasqan Passo dello Stelvıo shańǵy shıpajaıyna tarttyq. Aıta ketý kerek, 2010 jyly dál osy jerde Qazaqstan sańlaǵy Aleksandr Vınokýrov «Trentıno» jarysynda qarsylastaryn shań qaptyryp, máreni birinshi bolyp kesken edi. Elimizdiń ataq-dańqyn aspandatqan Stelvıo máresine úmitpen qaradyq. Bir qyzyǵy, ádette jarys joly «Djıronyń» resmı túsi – qyzyl-kúlgin tústi sharlarmen bezendiriletin. Márege eki shaqyrym qalǵanda aınalaǵa baıraǵymyz tústes sharlardyń ilingenin kózimiz shaldy. Ishimizden ony da jaqsylyqqa baladyq. Aıtqandaı-aq, oılamaǵan jerden chehtyń órimdeı jigiti Roman Kroısıger sýyrylyp alǵa umtyldy. Qasynda senimdi kómekshileri qazaqstandyq Andreı Zeıs pen belgııalyq legıoner Kevın Seldraıers. Artynan Mıshel Skarponı bastaǵan júırikter qýyp keledi. Márege ilingen kógildir ekrannan kóz almaı qarap otyrǵan jankúıerler Roman máre syzyǵyn keskende, «Astana! Roman!» dep shý ete qaldy.
Komandalyq áriptesin qoldaýǵa kelgen Aleksandr Vınokýrov «Romanǵa alǵysymyz sheksiz. Búgingi jeńis naǵyz myqtylardyń qolynan ǵana keledi», dedi.
Astananyń betin qaqpa, belin bý
Endi bir aıdan soń mártebesi eń joǵary «Týr de Frans» velododasy bastalady. «Astana» slovenııalyq Iаnes Braıkovıchti kapıtan saılapty. Aleksandr Vınokýrov ta bar qatarda. Onyń mindeti – jarys jolynda jastarǵa aqyl-keńes berý. Al basty maqsaty – sportpen qoshtasar aldynda Fransııada kezeńdik jarystardyń birinde top jarý. Elimizdiń ataq-dańqyn aspandatýga bel býǵan sańlaqtarymyzǵa aq jol tileıik! Osyǵan baılanysty Eresekter «Astanasy» men ótken jyly qurylǵan «Astana-2» jobasynyń tizginin qatar ustaǵan Dmıtrıı Sedýnǵa «qarakóz velosportshymyz qashan shyǵady?» dep suraqty tótesinen qoıdyq. «Qazaq velosıped tebe alady. Bir-eki jylda qazaqtan taǵy bir Vınokýrov shyǵyp jatsa, tańqalmańyz. Maqsat Aıazbaev, Nurbolat Qulymbetov, Nazar Jumabekovter bar. Aıanbaı ter tókse, bolashaǵy zor jigitter», dep qysqa qaıyrdy ol.
Dına YSQAQOVA, jýrnalıst, arnaıy
«Egemen Qazaqstan» gazeti úshin.
ALMATY – MILAN – TREVIZO – PAMPEAGO – STELVIO – ALMATY.