Aımaq basshysy eń aldymen Qarǵaly, Oıyl, Muǵaljar aýdandarynda birinshi hatshylyq qyzmetterin atqarǵan, Aqtóbe oblysyna belgili azamat Sapar Saǵyntaevtyń shańyraǵynda boldy. Sonymen qatar, Baıǵanın, Shalqar aýdandarynda 20 jylǵa jýyq birinshi hatshylyq laýazymyn atqarǵan, eki márte Eńbek Qyzyl Tý, Oktıabr revolıýsııasy, eki márte «Qurmet belgisi» ordenderiniń ıegeri Smatolla Berkimbaevtyń otbasyna bardy. Aqsaqaldy mereıli merekemen quttyqtap, suhbat qurdy.
«Sizderdeı Aqtóbeniń qurmetti azamattarymen kezdesip, ózderińizben suhbattasý men úshin úlken mártebe. Týǵan jerdiń damýyna qosqan úlesterińiz shash etekten. Qasıetti ólkemizdiń gúldenýine qosqan kómekterińizdi jas urpaq umytpaq emes. Otbasylaryńyzǵa amandyq, bereke, birlik tileımin», dedi oblys ákimi.
90 jasqa taıap qalǵan qarııalar oblys basshysynyń arnaıy ýaqyt bólip kelgeni úshin alǵystaryn bildirip, aq batalaryn berdi. Keleli kezdesý barysynda Sapar Saǵyntaev pen Smatolla Berkimbaev ótken ómir joldarynan estelik áńgimeler aıtyp, elge tynyshtyq pen aýyzbirshilik tiledi.