Qasym-Jomart Toqaevqa elimizdegi otyn-energetıka kesheniniń jaǵdaıy, negizgi jobalardy júzege asyrý barysy jáne sektordy odan ári damytý jospary jóninde esep berildi, dep habarlaıdy Egemen.kz Aqordanyń baspasóz qyzmetine silteme jasap.
Prezıdentke munaı salasynda ornyqty dınamıka saqtalyp turǵany aıtyldy. Sondaı-aq Memleket basshysyna munaı óńdeýdi ulǵaıtý jospary baıandaldy. Sol arqyly Shymkent munaı óńdeý zaýyty jylyna – 6-dan 12 mıllıon tonnaǵa, Atyraý munaı óńdeý zaýyty – 5,5-ten 6,7 mıllıon tonnaǵa jáne Pavlodar munaı-hımııa zaýyty 5,5-ten 9 mıllıon tonnaǵa deıin óndiristik qýatyn arttyrady.
Erlan Aqkenjenov 2029 jylǵa deıin salynatyn jańa energetıkalyq nysandar jaıynda málimet berdi. Bıyl Almaty qalasynda ekinshi jylý elektr ortalyǵynyń qurylysy aıaqtalady. Sonymen qatar Qyzylorda men Túrkistan oblystarynda bý-gaz qondyrǵylary bazasynda elektr stansııasy boı kóteredi. Budan bólek, «Kómir óndirýdi damytý» ulttyq jobasynyń ázirlený barysy týraly aqparat usyndy.
Kezdesý sońynda Prezıdent otyn-energetıka sektoryn odan ári damytý, sonyń ishinde munaı-gaz, munaı-gaz hımııasy jáne elektr energııasy salalarynda josparlanǵan jobalardy ýaqtyly ári sapaly júzege asyrý boıynsha birqatar tapsyrma berdi. Memleket basshysy óndiristik nysandardyń tıimdiligin arttyrý úshin sıfrlyq sheshimder men jasandy ıntellekt tehnologııalaryn belsendi túrde engizý mańyzdy ekenine toqtaldy.
Aıta keteıik, keshe Memleket basshysy Azııa damý banki prezıdenti Masato Kandany qabyldaǵan edi.