Senatorlar sybaılas jemqorlyqqa qarsy jańa zańdardy qabyldady. Jańa normalarǵa sáıkes, endi memlekettik qyzmetshiler men olarǵa teńestirilgen tulǵalarǵa qyzmettik ókilettikterin jeke múdde úshin paıdalanýǵa qatań tyıym salynady, dep habarlaıdy Egemen.kz.
Sonymen qatar, múddeler týraly deklarasııa tapsyrý mindeti engizilip, múddeler qaqtyǵysy týyndaǵan jaǵdaıda naqty áreket etý tártibi belgilendi.
Zańda týystardyń bir mekemede jumys isteýine qatysty shekteýler de keńeıtildi. Endi tikeleı baǵynyshtylyqpen qatar, janama yqpal etý, kadrlyq súıemeldeý jáne ishki baqylaý sııaqty jaǵdaılar da eskeriledi.
Sondaı-aq antıkorrýpsııalyq shekteýlerdiń aýqymy keńeıtilip, kvazımemlekettik sektor qyzmetkerleri men bıýdjet jáne Ulttyq qor esebinen qarjylandyrylatyn jobalarǵa qatysýshylar da qamtyldy. Memlekettik organdardaǵy kadrlyq prosesterdi sıfrlandyrý maqsatynda «E-qyzmet» júıesin qoldaný tártibi bekitildi.
Jemqorlyqpen kúres: Alty jylda 1 000-nan astam sheneýnik sotty boldy
Eń mańyzdy ózgeristerdiń biri – endi para berýge ýáde etý, usyný nemese talap etý de qylmystyq jaýapkershilikke jatqyzylatyn boldy. Sonymen qatar, zańdy tulǵalardyń jemqorlyq quqyqbuzýshylyqtary úshin ákimshilik jaýapkershilik kúsheıtildi, al ákimshilik ister boıynsha eskirý merzimi 1 jyldan 3 jylǵa deıin uzartyldy.
Al jemqorlyq qylmys jasaǵan tulǵalarǵa memlekettik fýnksııalardy atqaratyn laýazymdarǵa ómir boıy jumysqa turýǵa tyıym saqtalady.
Eske sala keteıik, buǵan deıin Májilis saılaý júıesine qatysty jańa zań qabyldaǵan bolatyn. Zańǵa sáıkes, jemqorlyqpen sottalǵandar endi saılaý komıssııasyna múshe bola almaıdy.