Májilis depýtaty Abzal Quspan zań jobasynyń avtory Edil Jańbyrshınge munaı kompanııalaryna tekseris júrgizý, osy máselege qatysty Ekologııalyq jáne Kásipkerlik kodeksterdegi qarama-qaıshylyqtar jóninde suraq qoıdy, dep habarlaıdy Egemen.kz.
Depýtat sózdiń basyn «munaı bizdiń baǵymyz ári sorymyz» dep bastap, onyń Qazaqstandy asyrap otyrǵany ne kerek, batys óńiriniń jurtshylyǵy osy munaıdyń zardabyn tartyp otyrǵanyn alǵa tartty.
«Meniń kótergeli otyrǵan máselem – Kásipkerlik kodeks pen Ekologııalyq kodekstiń arasyndaǵy problema. 2015 jyly Kásipkerlik kodeksti qabyldadyq, soǵan sáıkes kásipkerlik sýbektilerdi tekserýge bir aı buryn eskertý degen normany engizip qoıdyq. Sodan beri batys óńirlerinde, ásirese, munaı qaldyqtaryn tógý saldarynan zardaptardy joıý jáne jaýapkershilikke tartý máselesi týyndap keledi. Eń sońǵy jaǵdaı 2024 jyly «MańǵystaýMunaıGaz» kompanııasyna Kaspııge munaı qaldyqtaryn tókkeni úshin 32 mlrd teńgege aıyppul salyndy. Birinshi sot kúshinde qaldyrdy, apellıasııalyq sot zańdy dep tapty. Joǵary sot bir aı buryn eskertilmegen degen prosedýralyq negizdermen bunyń bárin zańsyz dep buzyp tastady», dedi Abzal Quspan.
Depýtattyń aıtýynsha, mundaı jaǵdaı sońǵy 10 jylda turaqty túrde qaıtalynyp kele jatyr. Joǵary sot tómengi sottardyń aktilerin buza salady.
Májilis depýtaty Edil Jańbyrshın bul másele tek munaı gaz salasyna qatysty emes, barlyq I jáne II kategorııaly nysandarǵa qatysty ekenin aıtty.
«Bular endi asa qaýipti nysandar bolyp esepteledi. Kásipkerlik kodeksten ekologııalyq baqylaý, qadaǵalaý máselesin alyp, osy salalyq Ekokodekske engizdik. Bul jerde úsh másele – dıstansııalyq baqylaý, baqylaý jáne avtomattandyrylǵan monıtorıngtik baqylaý bar. Dıstanııalyq baqylaý boıynsha ol jerde quqyqbuzýshylyq bolsa, aıyppul salynbaıdy. Biraq ol tekserýge negiz bolady», dedi Edil Jańbyrshın.
Onyń aıtýynsha, tekserýdiń ózi ekige bólinedi – josparly jáne josparsyz.
«Másele sol josparsyzda bolyp otyr. Qazir teksergende prokýratýradan tirkelý kerek, oǵan ýaqyt ketedi, bul aralyqta kompanııalar ózderiniń búldirgen zattaryn jasyrýy múmkin nemese jel soǵyp ýly gazdardy alyp ketedi. Faktini ol jerde fıksasııa jasaý óte qıyn. Sondyqtan bizder osy normany engizdik. Ekinshi oqylymǵa deıin bul máselege núkte qoıatyn shyǵarmyz», dedi depýtat.